Kýrsanttar parashıýtpen alǵash ret sekirdi
«Áýege alǵash kóteriler aldynda teorııalyq jáne jer ústi daıarlyǵy ótkizildi. Kýrsanttar tájirıbeli oqytýshylardyń jetekshiligimen parashıýt júıeleriniń taktıkalyq-tehnıkalyq sıpattamalaryn, kúmbezdiń ashylýyna deıingi jáne ashylǵannan keıingi parashıýtshilerdiń is-qımyldaryn zerdeledi, jerge qoný tártibin pysyqtady. Synaq tapsyrǵannan keıin ǵana kýrsanttar sekirýge ruqsat aldy.
Kýrsanttar birinshi ret qarýsyz jáne jol dorbasyz sekirdi. Ýaqyt óte kele parashıýttik daıarlyq qarqyny ósken tusta kýrsanttar qarýmen jáne tolyq jaraqtarymen, túnde, kúrdeli jergilikti jer jaǵdaıynda nemese sýǵa sekiretin bolady», - delingen QR Qorǵanys mınıstrligi baspasóz qyzmetiniń málimetinde.
Kýrsanttarmen birge Qurlyq áskerleri Áskerı ınstıtýtynyń bastyǵynyń tárbıe jáne áleýmettik-quqyqtyq jumystar jónindegi orynbasary polkovnık Rýslan Qabdýlınov kezekti ret parashıýtpen sekirdi. Onyń esebinde 170-ten astam parashıýtpen sekirý tirkelgen. Ol tálimger-ofıtser retinde kýrsanttarǵa jeke úlgi kórsetýdi ózine paryz sanaıdy.
«Kýrsanttar ózderimen birge bir ushaqta parashıýtpen sekirýge daıyn komandırlerin kórgen kezde olardyń moraldyq-psıhologııalyq jaǵdaıy aıtarlyqtaı nyǵaıyp, jaýapkershiligi men maqtanysh sezimin arttyrady, óz kúshine degen senimi nyǵaıady», - deıdi polkovnık Qabdýlınov.
Komandalyq pýnktten kýrsanttardyń sekirýin Aeroutqyr áskerleriniń qolbasshysy general-maıor Dáýlet Ospanov jáne onyń áýe-desanttyq daıarlyq jónindegi orynbasary polkovnık Vıktor Jıtnık baqylady. Desant túsirý irkilissiz ótip, barlyq desantshylar qoıylǵan mindetti oryndaı bildi.