Qurbandyqqa qandaı maldar jaramaıdy
«Qoı, eshki, sıyr jáne túıe maldaryn ǵana qurbandyqqa shalýǵa bolady. Qurban retinde shalynatyn qoı jáne eshki kem degende bir jasar, sıyr eki jasar, túıe bes jasar bolýy kerek. Alty-jeti aılyq toqty bir jasar qoı sııaqty semiz, etti bolsa, qurbandyqqa shalýǵa jaraıdy. Qoı men eshkiniń erkegin, sıyrdyń urǵashysyn shalý abzal. Al elik, arqar sııaqty ańdar men taýyq, qoraz, qaz, úırek sııaqty qustar qurban retinde soıylmaıdy», - dedi Baýyrjan Mansurov OKQ-de ótken brıfıngte.
Onyń aıtýynsha, qoı nemese eshkini tek bir adam qurban retinde shala alady.
«Sıyr nemese túıeni, ıaǵnı iri qarany bir kisiniń jalǵyz ózi úshin shalýyna bolady. Sondaı-aq jeti kisige arnap, ortaq shalýlaryna da bolady. Qurbandy ortaqtasyp shalǵan ýaqytta árbir adam qurban shalý nıetimen ortaqtasýy kerek. Bir kisi qurban úshin, al ekinshi bir kisi tek qana etin alý nıetimen ortaqtassa, shalynǵan mal qurban bolyp eseptelmeıdi»,-
Mynadaı kemshiligi bar maldar qurbandyqqa jaramsyz:
- Bir kózi soqyr;
- Soıylatyn jerge jete almaıtyn dárejede kóterem;
- Qulaǵy nemese quıryǵy týmadan joq nemese basym bóligi kesilgen;
- Tisteriniń kóbi túsip qalǵan;
- Emshekteriniń basy julynyp qalǵan;
- Bir múıizi nemese ekeýi de túbinen synǵan.
«Qurban shalýy ýájip bolǵan kisiniń qurbandyq malynda atalmysh kemshilikterdiń bireýi satyp alǵannan keıin paıda bolsa nemese alǵan maly ólip qalsa, qaıtadan qurbandyqqa jaraıtyn mal satyp alyp shalýy kerek. Al qurban shalý ýájip bolmasa da, saýap úshin shalýdy nıet etken kedeı adamnyń satyp alǵan qurbanynda bir kemshilik paıda bolsa, sol maldy shala beredi. Tipti qurban shalýy ýájip bolmaǵan kedeı adam boıynda kemshiligi bar maldy satyp alyp, qurban retinde shalýyna bolady. Óıtkeni kedeı adamnyń shalǵan qurbandyǵy – nápil qurbandyq. Nápil ǵıbadatta keshirim bar», - deıdi ol.
