Qurban aıt merekesi 6 maýsymda bastalady — QMDB

ASTANA. KAZINFORM — Qazaqstan musylmandary dinı basqarmasynyń tóraǵasy Naýryzbaı qajy Taǵanuly bıyl elimizde Qurban aıt merekesi qaı kúni bastalatynyn aıtty. 

— Bıyl qasıetti Qurban aıt merekesi 6 maýsymda bastalady. Qazaqstan musylmandary dinı basqarmasy birqatar alys ta jaqyn musylman elderdiń ǵulamalarymen, pátýá shyǵarý ortalyqtarymen keńesip, osyndaı pátýá qabyldady, — dedi Bas múftı QMDB-da ótken baspasóz máslıhatynda.

Sondaı-aq ol bul merekeniń qazaq halqynyń dástúrinde orny bólek ekenin atap ótti.

— Baǵzy zamannan beri Islam dinin rýhanı tiregine aınaldyrǵan halqymyz Qurban aıtty aıryqsha daıyndyqpen qarsy alǵan. Maldyń semizin, jaramdysy men eń jaqsysyn qurbandyqqa shalyp, etin turmysy tómen adamdarǵa taratý, qonaq kútip, úlkenniń batasyn alý, syılyqqa káde berý sekildi amaldar dástúrimizde qalyptasqan izgi qundylyqtar, — dedi Naýryzbaı qajy Taǵanuly.

QMBD málimetinshe, Islam dininde qasıetti kúnder, túnder jáne aılar qamarı jyl sanaýy negizinde anyqtalady. Mundaı jyl sanaýy aı fazasynyń ózgerýine negizdelgen. Jańa aıdyń kórinýimen jańa aı bastalady. Qamarı aı keıde 29 ne 30 kún bolady.

Zýlhıjja aıyn anyqtaý úshin zýl-qaǵda aıynyń 29-nda aıdy baqylaıdy. Kún batqan kezde jańa aı kórinse, kelesi kúni zýl-hıjja aıy bastalǵan bolyp sanalady. Eger kún bultty bolyp, aı kórinbese, zýl-qaǵda aıyn 30 kúnge tolyqtyrady.

Osy negizde 2025 jyly 27 mamyrda jańa aıdyń kórinýine baılanysty bıyl zulhıjja aıy 28 mamyrda bastalyp, arapa 5 maýsymǵa, al qurban aıt 6 maýsymǵa saı keledi. 

Aıta ketelik Qurban aıtta qazaqstandyqtar qansha kún demalatyny týraly jazǵan edik.