Qurban aıt: Qazaqstanda qoı baǵasy qansha
ASTANA. KAZINFORM — Qysqa qaraǵanda qazir elimizdiń keıbir óńirinde tórt túlik baǵasy 20-50% kóterildi. Degenmen keı oblysta baǵa ózgerissiz qaldy.
Qurbandyqqa shalatyn qoı baǵasy Aqtaýda joǵary bolyp shyqty. Munda Qurban aıt merekesine deıin qoı 70 000 teńgege satylsa, qazir baǵa orta eseppen 120 000 teńge bolyp tur. Eń arzanyna da, qymbatyna da orta eseppen 20 000 teńge qosylyp, qazir qurban malyn 90 000-140 000 teńgege satyp alýǵa bolady. Almatyda da toqty men qoı baǵasy shamalas. Munda baǵa 75 000 teńgeden bastalyp, 150 000 teńgege deıin jetti. Mereke jaqyndaǵan saıyn bazarda toqtylar azaıyp jatyr. Aıtyp óteıik, elimizdiń ońtústik astanasynda qoı baǵasy qysta da joǵary bolǵan. Tek toqtyny 35 000 teńgege satyp alýǵa múmkindik boldy.
Al Aqtóbe men Astanada toqty, qoı baǵasy 70 000 teńgeden bastalyp, 120 000 teńgege jetip tur. Qoı baǵasy keı jerde sál arzan. Degenmen bul óńirlerde de Shopan ata tóli qysta qazirgi baǵadan tómen boldy. Aqtóbede baǵa sál ózgergenimen, Astanada jarty jylda qoı quny keı jerde eki ese kóterildi.
Elimizdiń ońtústigindegi Túrkistan, Taraz ben Shymkentte qurbandyqqa shalýǵa bolatyn toqty men qoı baǵasy 60 000 teńgeden bastalyp, 120 000 teńgege jetti. Tek Túrkistan men Shymkentte quny arzan qurbandyq malyn tabý qıyndaı túsken. Al Tarazda semiz qoı satyp alǵyńyz kelse, baǵa sál joǵary bolyp tur.
Atyraý, Óskemen, Semeı men Taldyqorǵanda qurbandyqqa shalynatyn qoı baǵasy 65 000 — 90 000 teńge. Bul qalalarda baǵa buǵan deıin de osy shamada boldy. Suranysqa qaraı qazir baǵanyń shamamen 20 000 teńgege kóterilgenin kórýge bolady.
Qonaev, Qyzylorda, Kókshetaý men Petropavlda qoı baǵasy — 55 000-85 000 teńge. Bul qalalarda da suranys artqanymen, baǵa qystaǵydaı kúıde saqtalyp qaldy.
Qaraǵandy men Jezqazǵanda qurbandyqqa shalatyn qoı baǵasy shamamen 45 000-80 000 teńge.
Pavlodar men Oralda qoı baǵasy — 60 00 teńge. Munda da baǵa ózgermedi.
Qurban aıt merekesi qarsańynda qoı baǵasyn salystyryp, eń arzany Qostanaı qalasynda ekeni anyqtaldy. Munda baǵa — 40 000 — 60 000 teńge.
Buǵan deıin mektep túlekteriniń keshine qansha qarjy qajet ekeni týraly jazyldy.