Qurban aıt: Elimizde 17 maýsym – jumys kúni

ASTANA. KAZINFORM – Búgin Qazaqstan musylmandary dinı basqarmasy Qurban aıt meıramyna qatysty túsinik berdi.

«Búgin hıjrı jyl sanaýy boıynsha zýl-hıjja aıy bastaldy. ıAǵnı Arapa kúni bıyl 15 maýsymǵa sáıkes keledi. 16 maýsym – Qurban aıt merekesiniń birinshi kúni», - delingen habarlamada.

Dinı basqarmanyń aqparatyna súıensek, ıslam dininde qasıetti kúnder, túnder jáne aılar qamarı jyl sanaýy negizinde anyqtalady. Mundaı jyl sanaq aı fazasynyń ózgerýine qaraı esepteledi. Jańa aıdyń (hıláldyń) kórinýimen jańa aı bastalady. Qamarı aı keıde 29 ne 30 kún bolady. Zýl-hıjja aıyn anyqtaý úshin zýl-qaǵda aıynyń 29-nda aıdy baqylaıdy. Kún batqan kezde jańa aı kórinse, kelesi kúni zýl-hıjja aıy bastalady. Eger aýa bultty bolyp, aı kórinbese, zýl-qaǵda aıyn 30 kúnge tolyqtyrady.

«2024 jyly 6 maýsymda jańa aıdyń kórinýine baılanysty bıyl zulhıjja aıy 7 maýsymda bastalyp, arapa 15 maýsymǵa, al qurban aıt 16 maýsymǵa saı keledi», - deıdi basqarmadan.

Osy oraıda Eńbek jáne halyqty áleýmettik qorǵaý mınıstrligi túsinikteme berdi.

«Qurban aıttyń birinshi kúni musylman kúntizbesi boıynsha atap ótiledi. Qazaqstan musylmandary dinı basqarmasy 16 maýsym (jeksenbi) dep jarııalady, ıaǵnı bul – demalys kúni. Sondyqtan qurban aıt merekesi basqa kúnge aýystyrylmaıdy», - deıdi mınıstrlikten.

Eske sala keteıik, buǵan deıin bıyl Qurban aıt merekesi 17 maýsym, ıaǵnı, dúısenbige túsip turǵany týraly habarlaǵan edik.