Qulsarynyń alǵashqy 15 turǵynyna ótemaqy tólendi
ATYRAÝ. KAZINFORM — Qulsary turǵyndaryna baspanany jóndeý maqsatyna arnalǵan ótemaqy tólene bastady. Bul týraly Jylyoı aýdanynyń ákimi Jumabek Qarajanov sý tasqynynan zardap shekken turǵyndarmen kezdesý barysynda habarlady
Qulsarynyń alǵashqy 15 turǵynyna jóndeý-qalpyna keltirý jumystaryna óteamqy tólendi.
Aýdan basshysynyń aıtýynsha, 17 mamyrda múlikti baǵalaý nátıjelerin alǵan Qulsarynyń alǵashqy 15 turǵyny kelisim shartyna qol qoıǵannan keıin óz shottaryna aqshalaı tólemder alǵan. Endi olar jóndeý-qalpyna keltirý jumystaryna kirisedi.
«Atyraý oblysynyń ákimi atap ótkendeı, Qulsarynyń árbir turǵynynyń turǵyn úıin baǵalaý boıynsha jaǵdaı jeke qaralady», — dedi Jumabek Qarajanov.
Sondaı aq, ol turǵyndarǵa úıdi apatty dep taný kezinde, sondaı-aq jóndeý-qalpyna keltirý jumystaryn júrgizý kezinde keltirilgen zalaldy óteý tártibi týraly aqparat berip ótti.
Eske sala keteıik, Qulsary qalasynda 150 úıdiń qurylysy bastalady.
