Kýbada ulttyq elektr jelisi isten shyqty

ASTANA. KAZINFORM – Kommýnıstik basqarý júıesi ornaǵan Kýba memleketinde ulttyq elektr jelisi bir jyldyń ishinde tórtinshi márte isten shyqty. 

ÓzA aqparat agenttiginiń málimetinshe, bul týraly SEN eldiń memlekettik energetıkalyq kompanııasy habarlaǵan. 

– «SEN» ulttyq elektr jelisinde tolyq úzilis tirkeldi. Bul jaǵdaıdyń «CTE Guiteras» jylý elektr stansasynyń kútpegen jerden toqtap qalýymen baılanysty bolýy múmkin, - delingen Elektr energetıkasy qyzmetkerleriniń ulttyq odaǵy taratqan resmı málimdemede.

Kompanııanyń jaýapty ókili oqıǵanyń naqty sebebi anyqtalyp jatqanyn, qazirgi kezde qalypqa keltirý jumystary bastalyp ketkenin aıtty. 

Eske sala keteıik, buǵan deıin Ispanııa men Portýgalııa elektr jaryǵynsyz qalǵanyn jazǵan edik.