Qýandyq Bıshimbaevtyń isi sotqa tústi

ASTANA. KAZINFORM – Eks-sheneýnik Qýandyq Bıshimbaevqa qatysty is sottyń qaraýyna jiberildi.

«2024 jylǵy 26 aqpanda Astana qalasynyń qylmystyq ister jónindegi mamandandyrylǵan aýdanaralyq sotyna kúdiktiler Q.Bıshimbaev pen B.Baıjanovqa qatysty qylmystyq is kelip tústi», - delingen habarlamada.

Sottyń aqparatynda aıtylǵandaı, kúdikti Qýandyq Bıshimbaevqa QR Qylmystyq kodekstiń 99-baby 2-bóliginiń 5) tarmaǵy boıynsha adam óltirý, qasaqana, asa qatygezdikpen adam óltirý, Qylmystyq kodekstiń 110-baby 2-bóliginiń 1) tarmaǵy boıynsha materıaldyq jaǵynan táýeldi adamdy júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylǵan.

Kúdikti B.Baıjanovqa Qylmystyq kodekstiń 432-baby boıynsha asa aýyr qylmysty jasyrý jáne Qylmystyq kodekstiń 434-baby asa aýyr qylmys jasaǵany týraly habarlamaý faktisi boıynsha aıyp taǵylǵan.

«Qylmystyq-protsestik kodekstiń 319-babyna sáıkes, sýdıa isti sotta qozǵaý týraly sheshimdi 5 táýlikten keshiktirmeı shyǵarady», - deıdi qalalyq sottan.

Eske sala keteıik, 2023 jyly 9 qarashada Astanadaǵy Baý meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem kelgenshe kóz jumdy.

Keıin Іshki ister mınıstrligi Qýandyq Bıshimbaevtyń ustalǵanyn rastady.

Ótken jyly 15 qarashada ótken keńeste Prezıdent Q.Toqaev Іshki ister mınıstrine Bıshimbaevtiń isin erekshe baqylaýǵa alýdy tapsyrdy.

Aıta ketsek, bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi.