Krıptobırja sarapshylary altsezonnyń jaqyndaǵanyn málimdedi
ASTANA. KAZINFORM — Coinbase krıptobırjasynyń sarapshylary 2025 jyldyń qyrkúıeginde aýqymdy altsezonnyń bastalýyn boljady, dep jazdy AZERTADJ.
ÁZERTADJ The Block basylymyna silteme jasap, mundaı qorytyndysyna bıtkoınniń naryqtaǵy ústemdiginiń tómendeýi, basqa krıptoaktıvterdiń kapıtalızatsııasynyń artýy jáne Ethereum-ge degen qyzyǵýshylyqtyń ósýi sebep bolyp otyr. Coinbase taldaýshylarynyń negizgi tujyrymy — naryq 2025 jylǵy qyrkúıekte tolyqqandy altsezonǵa kóshýdi meńzep otyr. Bul birneshe faktormen dáleldenedi.
Alaıda, CoinMarketCap usynǵan altsezon ındeksi 45 tarmaq deńgeıinde, bul altsezonnyń bastalýyn bildiretin shekti mánnen (75 tarmaq) tómen.
Indekstiń osy salystyrmaly túrde tómen máni altkoın sektoryndaǵy kapıtalızatsııanyń 2025 jyldyń shilde aıynyń basynan beri 50%-dan astamǵa ósip, 1,4 trln dollarǵa jetkenine qaramastan saqtalyp otyr. Bul ósim, eń aldymen, Ethereum-ge degen suranystyń artýymen, atap aıtqanda, qazynashylyqty basqarý salasyndaǵy kompanııalar belsendiligimen, steıblkoındar men naqty aktıvterge baılanǵan tokenderdiń (RWA) tanymaldylyǵymen baılanysty.
Sonymen qatar, Coinbase esebinde bıtkoınniń naryqtaǵy ústemdiginiń tómendeýi de atap ótildi. Eger mamyr aıynda bul kórsetkish 65% deńgeıinde bolsa, tamyzda 59%-ǵa deıin túsken. Maqala daıyndalǵan sátte bul kórsetkish 59,3% boldy.
Coinbase saraptamasy makroekonomıkalyq faktorlarǵa da, normatıvtik ózgeristerge qatysty kútýlerge de súıengen. Makrofaktorlarǵa mysal retinde, álemdik M2 aqsha massasynyń ındeksi 2025 jyldyń III toqsanynyń sońynda nemese IV toqsanynyń basynda naryqqa ótimdilik aǵyny bolýy múmkin ekenin kórsetedi.
Sonymen qatar, AQSh-taǵy aqsha naryǵy qorlarynda shamamen 7,2 trln dollar saqtaýly. Sáýir aıynda bul kólem 150 mlrd dollarǵa azaıǵanymen, maýsymnan bastap 200 mlrd dollardan astam ósim tirkeldi. Bul kezde krıptonaryqta da ósim baıqaldy, bul ádettegi keri korrelıatsııamen qaıshy keledi.
Coinbase pikirinshe, bul kapıtal — birqatar faktorlarǵa, sonyń ishinde AQSh-taǵy retsessııaǵa qatysty alańdaýshylyqqa baılanysty jiberilgen múmkindik bolyp sanalady. Alaıda qyrkúıekte FRJ-nyń monetarlyq saıasatty jumsartýy (osyndaı boljamdar bar) aqsha naryǵy qorlarynyń tartymdylyǵyn tómendetip, ótimdilikti bosatýy múmkin.
Sarapshylardyń aıtýynsha, steıblkoındardyń zańdastyrylýy men Ethereum-ge degen suranystyń artýy erkin kapıtaldyń dál altkoındarǵa baǵyttalýyna alyp keledi. Bul tek kapıtalızatsııasy boıynsha ekinshi krıptovalıýta – Ethereum ǵana emes, búkil altkoın sektorynyń ósýine ákelýi múmkin.
Bul tujyrym keıbir altkoındardyń Ethereum-ge qaraǵanda joǵary beta-kiristilik kórsetýimen de rastalady. Atap aıtqanda, ARB, ENA, LDO jáne OP tokenderi mysal retinde keltirilgen.
Buǵan deıin habarlanǵandaı, AQSh-taǵy PPI ósimi jahandyq naryqtaǵy táýekelge qyzyǵýshylyqty báseńdetti.