QR SІM Ýkraınada oryn alǵan jaǵdaılar boıynsha málimdeme jasady
ASTANA. QazAqparat - QR Syrtqy ister mınıstrligi Ýkraınada oryn alǵan jaǵdaılar boıynsha málimdeme jasady.
Bul týraly vedomstvonyń baspasóz qyzmetinen habarlandy.
«Kıevte jáne Ýkraınanyń basqa da qalalarynda narazylyq aktsııasyna qatysýshylary, sondaı-aq quqyq qorǵaý organdarynyń ókilderi arasynda qazaǵa ákelgen qaqtyǵystardyń ýshyǵýyn úlken alańdaýshylyqpen qabyldadyq.
Myqty jáne bedeldi, ekonomıkalyq, óndiristik jáne adamı áleýeti zor memleketke saıası qarama-qaıshylyqtardyń tıgizip otyrǵan zardabyn ókinishpen atap ótemiz.
Qazaqstan men Ýkraınany dástúrli dostyq jáne strategııalyq qarym-qatynas baılanystyrady, olardyń negizinde ózara senim men qurmet jatyr. Biz Ýkraınany mańyzdy áriptesimiz retinde qarastyramyz.
Biz zorlyqtyń kez kelgen túrin qatań synaımyz jáne Ýkraınanyń barlyq saıası kúshterin ustamdylyqqa, qantógisti toqtatýǵa, memlekettiń konstıtýtsııasy men zańdaryna sáıkes tártip ornatýǵa shaqyramyz. Sonymen qatar, halyqaralyq qaýymdastyqty da osy eldegi jaǵdaıdy turaqtandyrýǵa barynsha yqpal jasaýǵa shaqyramyz», - delingen habarlamada.
Sondaı-aq QR Syrtqy ister mınıstrligi polıtsııa men narazylyq aktsııasyna qatysýshylar arasyndaǵy qaqtyǵystardyń jalǵasýyna oraı Qazaqstan azamattaryna Ýkraınaǵa barý qaýpiniń artyp otyrǵany týraly habarlaıdy.
Osy oraıda Ýkraınaǵa barýǵa nıettenip otyrǵan nemese sol elde turyp jatqan Qazaqstan azamattaryna Syrtqy ister mınıstrligi barynsha abaı bolýlaryn, narazylyq, sherý jáne adamdardyń kóp shoǵyrlanǵan jerlerinen mindetti túrde alshaq júrýlerin jáne múmkindiginshe turǵylyqty jerlerinen túngi ýaqytta shyqpaýyn usynady.
«Tótenshe jaǵdaılarǵa tap bolǵan Qazaqstan azamattaryna Qazaqstannyń Kıevtaǵy Elshiliginiń Konsýldyq bólimine +38-066-467-87-97, + 38-063-375-00-07 nomerleri boıynsha nemese QR Syrtqy ister mınıstrliginiń tikeleı jelisine + 7-7172-72-04-72 nomeri boıynsha telefon arqyly habarlasýdy suraımyz», - delingen QR SІM-niń baspasóz habarlamasynda.
