QR OSK taǵy 207 baıqaýshyny akkredıttedi

ASTANA. QazAqparat - Búgin QR Ortalyq saılaý komıssııasynyń otyrysynda «2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisi depýtattarynyń kezekten tys saılaýyna jáne máslıhattary depýtattarynyń kezekti saılaýyna halyqaralyq uıymdar men shet memleketterdiń baıqaýshylaryn akkredıtteý týraly» qaýly qabyldandy.

«Qazaqstan Respýblıkasy Syrtqy ister mınıstrliginiń usynysymen Ortalyq saılaý komıssııasy EQYU/DIAQB mıssııasynan - 89, TMD mıssııanan - 8, Eýropa Keńesiniń Parlamenttik Assambleıasynan - 14, Túrkitildes elder yntymaqtastyǵynyń keńesinen - 17 jáne shet memleketterden - 79 baıqaýshyny akkredıtteıdi», - dedi atalǵan qaýly jobasyn tanystyrǵan QR OSK múshesi Tatıana Ohlopkova.

Aıta keterligi, 2016 jylǵy 14 naýryzdaǵy jaǵdaı boıynsha Ortsaılaýkom Syrtqy ister mınıstrliginiń usynýy boıynsha halyqaralyq uıymdar men shet memleketterdiń barlyǵy 815 baıqaýshysyn akkredıttedi. Olardyń ishinde EQYU/DIAQB-nyń 286, TMD mıssııasynyń -301, Shanhaı Yntymaqtastyq Uıymy mıssııasynyń -9, EQYU Parlamenttik Assambleıasynyń -75, Eýropa Keńesi Parlamenttik Assambleıasynyń -14, Túrkitildes elder yntymaqtastyǵy keńesiniń -17, Islam yntymaqtastyǵy uıymynyń - 3, Túrkitildes elderdiń Parlamenttik Assambleıasynyń 8 jáne shet memleketterdiń 102 baıqaýshysy bar. Munan bólek, Qazaqstan Respýblıkasy Syrtqy ister mınıstrligi 29 memleketten sheteldik BAQ-tyń 140 ókilin akkredıttedi.

Osylaısha, qazirgi ýaqytta 955 halyqaralyq baıqaýshy men sheteldik buqaralyq aqparat quraldarynyń ókili akkredıttelip otyr.