QPL: «Turan» qatarynan onynshy márte jeńilip qaldy

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń HVIIІ týrynda Shymkenttiń «Ordabasy» klýby túrkistandyq «Turandy» iri eseppen jeńdi.

Túrkistandyq komanda bıylǵy birinshilikti sátsiz ótkizip keledi. Qazir olar týrnır kestesinde nebári 11 upaımen on úshinshi orynda tur. Al «Ordabasy» aldyna úzdikter qatarynan kóriný mindeti qoıylǵan. Degenmen olar da týrnır kestesinde ortańǵy tusynda kele jatyr. Sondyqtan túrkistandyq komanda úshin búgingi kezdesýde jeńiske jetý mańyzdy bolatyn.

Birinshi kezeńde komandalar bir-biriniń qaqpasynan sańylaý taba alǵan joq. Esesine ekinshi kezeńde «Ordabasy» qatarynan tórt gol soǵyp ketti. Aldymen Vladıslav Naýmets 65-mınýtta esep ashsa, odan keıin Darıo Chanadjııa 75, Lýka Imnadze 77, Sergeı Malyı 96-mınýtta mergendik tanytty.

Osylaısha «Ordabasy» qarsylasynan 4:0 esebimen basym túsip, týrnır kestesinde jetinshi orynǵa kóterildi. Al «Turan» qatarynan onynshy márte jeńilistiń aşy dámin tatty.

Sondaı-aq 26 shildede almatylyq «Qaırat» syrt alańda Qostanaıdyń «Tobylyn» 3:1, óz alańynda semeılik «Elimaı» Taldyqorǵannyń «Jetisýyn» 3:0, qyzylordalyq «Qaısar» Petropavldyń «Qyzyljaryn» 1:0 esebimen jeńdi.

Al 25 shildede «Jeńis» (Astana) pen «Oqjetpes» (Kókshetaý) 0:0 esebine qanaǵat bildirdi. Bul týrdaǵy 30 sáýirde aldyn ala ótkizilgen oıynda «Atyraý» óz alańynda «Astanaǵa» 0:2 esebimen jol bergen edi.

Atalǵan týrdaǵy «Ulytaý» (Jezqazǵan) men «Aqtóbe» kezdesýi 20 qyrkúıek kúni ótkiziledi.