QPL: «Tobyl» men «Elimaı» teń tústi

ASTANA. KAZINFORM - Fýtboldan Qazaqstan Premer-lıgasynyń úshinshi týrynda qostanaılyq «Tobyl» men semeılik «Elimaı» komandalary kezdesti. 

Eki komanda bıyl júldeli oryndarǵa qol jetkizýdi qalaıdy. Sondyqtan árbir kezdesýde olar upaı oljalaýdy kózdeıdi.

Búgingi oıyn barysynda qostanaılyq klýb sapynan Nıkolaı Sıgnenvıch 9-mınýtta kózge tústi. Oǵan semeılik komandadan Floreský Edýard-Marıan 92- mınýtta bir golmen jaýap qaıyrdy.
Osylaısha qarsylastar 1:1 esebine qanaǵat bildirdi.

Teń esep «Ordabasy» (Shymkent) men «Qyzyljar» (Petropavl) kezdesýinde de tirkeldi. Qos komanda bir upaıdan enshiledi. 

Aıta ketsek, el birinshiliginiń úshinshi týrynda elordalyq «Astana» óz alańynda taldyqorǵandyq «Jetisýdy» 3:0, «Aqtóbe» syrt alańda «Atyraýdy» 4:0 esebimen tas-talqan etip jeńse, «Ulytaý» men «Jeńis» (Astana) 1:1 esebimen teń tarqasty. 

Atalǵan týrdyń alǵashqy oıyn kúni, 29 naýryzda «Qaırat» syrt alańda túrkistandyq «Turandy» 2:1 esebimen tize búktirse, «Qaısar» (Qyzylorda) men «Oqjetpes» (Kókshetaý) 2:2 esebin tirkedi.

Aldaǵy týr oıyndary 5 jáne 6 sáýir kúnderine belgilengen.