QPL: aldaǵy maýsymnyń kúntizbesi jasaldy

ASTANA. KAZINFORM - Qazaqstan fýtbol federatsııasynyń keńsesinde Qazaqstan Premer-lıgasy 2026 jylǵy maýsymynyń kúntizbesin jasaýǵa qatysty jerebe tartý rásimi ótti.

Bul is-shara onlaın túrde júrgizilip, oǵan QFF basshylyǵy, barlyq fýtbol klýbynyń ókilderi, jasandy ıntellekt tehnologııasyn qoldaný arqyly kúntizbe qurýǵa múmkindik beretin baǵdarlama ázirlegen Astana Hub rezıdentteri qatysty.

Jasandy ıntellektti jarystardy josparlaý kezinde qoldaný álemdik tájirıbede bar. UEFA eýrokýbok týrnırleriniń jerebe tartý rásiminde ınnovatsııalyq tehnologııalardy paıdalanady. Oǵan qosa kóshbasshy fýtbol klýbtary men ulttyq quramalar kúntizbeni ońtaılandyrý, júktemeni basqarý jáne uıymdastyrýshylyq úderisterdiń tıimdiligin arttyrý maqsatynda osyndaı tsıfrlyq sheshimderdi keńinen qoldanady.

Zamanaýı tsıfrlyq quraldardy engizý jasandy ıntellekt pen tsıfrlyq tehnologııalardy damytý jónindegi mindetter aıasynda júzege asyrylyp jatyr.

Kúntizbeni qalyptastyrý barysynda algorıtm sporttyq jáne uıymdastyrýshylyq faktorlardyń aýqymyn eskerdi. Atap aıtqanda, stadıondardyń qoljetimdiligi, túrli aýa raıy, klýbtardyń eýrokýboktarǵa qatysýy, FIFA-nyń halyqaralyq kúntizbesi, úı jáne syrt alańdaǵy matchtardyń josparlanýy, ınfraqurylymnyń jalpy júktemesi, iri qalalyq is-sharalardyń ótkizilýi, sondaı-aq jekelegen matchtarǵa qatysty qaýipsizdik máseleleri men erekshe baqylaý talaptary nazarǵa alyndy.

Premer-Lıga bıylǵy maýsymynyń alǵashqy týrynda «Aqtóbe» - «Tobyl» (Qostanaı), «Altaı» (Óskemen) - «Qaırat» (Almaty), «Astana» - «Jetisý» (Taldyqorǵan), «Atyraý» - «Ulytaý» (Jezqazǵan), «Qaısar» (Qyzylorda) - «Jeńis» (Astana), «Qyzyljar» (Petropavl) - «Kaspıı» (Aqtaý), «Oqjetpes» (Kókshetaý) - «Elimaı» (Semeı), «Ordabasy» (Shymkent) - «Ertis» (Pavlodar) oınaıdy.

Ekinshi týrda «Kaspıı» - «Oqjetpes», «Elimaı» - «Altaı», «Ertis» - «Atyraý», «Qaırat» - «Aqtóbe», «Qaısar» - «Astana», «Tobyl» - «Jetisý», «Ulytaý» - «Qyzyljar», «Jeńis» - «Ordabasy» kezdesedi.

Al úshinshi týrda «Aqtóbe» - «Elimaı», «Altaı» - «Kaspıı», «Astana» - «Tobyl», «Atyraý» - «Jeńis», «Qyzyljar» - «Ertis», «Oqjetpes» - «Ulytaý», «Ordabasy» - «Qaısar», «Jetisý» - «Qaırat» sheberlik baıqasady.

Aldaǵy maýsymnyń tolyq kúntizbesi QFF atqarýshy komıtetimen kelisilgennen keıin tolyq jarııalanady.