Qoı etiniń eksporty eki ese ósti — AShM

ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynda 2025 jyldyń 5 aıynda eldegi mal sany qalaı ózgergenin aıtty.

— Aýyl sharýashylyǵy janýarlarynyń barlyq túri boıynsha mal basy turaqty ósip otyr. Jyl basynan iri qara mal basy 23,4% artty (9,6 mln bas), usaq mal — 7,8% (26,3 mln bas), jylqy — 12,2% (5,0 mln bas), túıe — 8,5% (321,3 myń bas), qus — 2,2% (47,7 mln bas) ósti, — dedi ol.

Onyń sózinshe, Qazaqstan sharýalary et pen qoı etine degen ishki qajettilikti tolyqtaı qamtamasyz etip otyr.

— 2024 jyldyń qorytyndysy boıynsha sıyr etiniń eksporty 1,4 ese artyp, 22 myń tonnadan assa, qoı etiniń eksporty 2,2 ese ósip, shamamen 18 myń tonna boldy.

Jyl basynan mal sharýashylyǵynda óńdeý artty. Onyń ishinde shujyq ónimderi — 11,3%, et konservileri — 27,5%, tońazytylǵan jáne muzdatylǵan qosalqy ónimder tıisinshe 41,9% jáne 47,1% ósti, — dedi Aıdarbek Saparov.

Buǵan deıin Qazaqstanda aýyl sharýashylyǵyn tsıfrlandyrý qalaı júrip jatqanyna sholý jasaǵan edik.