Almaty mańyndaǵy «Barys» avtobazary memleketke tolyq qaıtarylýy múmkin
QONAEV. KAZINFORM – Jaqyn arada «Barys» avtobazary tolyǵymen memleket menshigine ótýi múmkin. Qazirgi tańda nysannyń jaı-kúıi qandaı ekenin jáne onda ne bolyp jatqanyn Kazinform agenttiginiń tilshisi anyqtap qaıtty.
Avtobazar Almaty oblysynyń Qarasaı aýdanynda, respýblıkalyq mańyzy bar tasjoldyń boıynda ornalasqan. Onyń jalpy aýmaǵy 36 gektardan asady. 2023 jyly sot sheshimimen 11 gektar jer memleketke qaıtarylǵan bolatyn. Qazirgi ýaqytta qalǵan 25,5 gektardan astam jer telimin qaıtarý máselesi qaralyp jatyr.
Aqparattyq tehnologııalar zamanynda avtobazarǵa arnaıy baryp kólik izdeıtinder azaıǵandaı kórinýi múmkin. Soǵan qaramastan, «Barys» áli de jumys istep tur: kelýshiler sany burynǵydaı kóp bolmasa da, munda satýshylar da, satyp alýshylar barshylyq. Degenmen, baıqaǵanymyzdaı qazirgi ýaqytta bazardyń jaǵdaıy aıtarlyqtaı máz emes. Alyp aýmaqta eski kólikter, Qytaıdan ákelingen sý jańa mashınalar tizilip tursa da, is júzinde bazar aýmaǵynyń bir bóligi ǵana jumys istep tur. Keıbir ýchaskeler bos qalyp, shóp basyp ketken, jan-jaqta qurylys qoqystary úıilip jatyr. Sondaı-aq aýmaqta káýaphanalar, ashanalar, notarıaldyq qyzmet oryndary, temir dúńgirshikter men ýaqytsha kommertsııalyq qurylystar ornalasqan.
Munda kólikti alǵashqy jarnasyz satyp alýdan bastap, Japonııa men AQSh-tan qosalqy bólshekter aldyrýǵa deıingi túrli usynystar jazylǵan bannerler qaptap tur. Al aptap ystyqta balmuzdaq satyp júrgen saýdagerler bazardaǵy beıbereket saýdanyń beınesin kórsetedi. Kólikter retsiz qoıylǵan, al satýshylar bazarǵa kirgeni úshin shamamen 2500 teńge tóleıdi. Bazar kún saıyn tańnan keshke deıin jumys isteıdi jáne adamdar kólikterin qaldyryp kete alady.
Jer memleketke qalaı qaıtarylyp jatyr
Biz bazardyń qazirgi jaǵdaıy men bolashaǵyn naqtylaý úshin oblys ákimdigine júgindik. Almaty oblystyq jer qatynastary basqarmasynyń jaýabyna sáıkes, 2004-2018 jyldar aralyǵynda jer ýchaskeleri B.Nazarbaevqa avtobazar ashý úshin jer zańnamasynyń talaptaryn buza otyryp berilgen. Atap aıtqanda, konkýrs ótkizilmegen jáne jer telimderi aýyl sharýashylyǵy maqsatyndaǵy sanattan zańsyz aýystyrylǵan.
Osy derekter negizinde Qarasaı aýdanynyń prokýratýrasy 2023 jylǵy 10 qańtarda jerdi memleket menshigine qaıtarý týraly talap aryz túsirdi. Qarasaı aýdandyq sotynyń 2023 jylǵy 17 sáýirdegi sheshimimen 11,5 gektar jer aýdannyń jer qoryna qaıtaryldy.
2025 jyldyń qarashasynda prokýratýra «Auto market Karasay» JShS-ne tıesili qalǵan 25,5 gektardan astam aýmaqty qaıtarý týraly jańa talap aryz bergen.
Alaıda B.Nazarbaev 2025 jyldyń qarashasynda qaıtys bolyp, muragerlik rásimdelmegendikten, prokýratýranyń talaptary bastapqyda sot tarapynan qaraýsyz qalǵan. Búginde muragerler kámeletke tolmaǵandyqtan 2026 jylǵy 4 aqpanda aryz Almaty oblysynyń kámeletke tolmaǵandar isteri jónindegi mamandandyrylǵan aýdanaralyq sotyna joldandy. 2026 jylǵy 1 sáýirde sot prokýratýranyń talap aryzyn qanaǵattandyryp, azamattyq-quqyqtyq mámilelerdi tolyǵymen jaramsyz dep tanydy.
Biraq Qarasaı aýdanynyń kásipkerlik bólimi qazirgi ýaqytta sot sheshimi áli zańdy kúshine enbegenin naqtylady. Túpkilikti quqyqtyq sheshim apellıatsııalyq shaǵym qaralyp bitkennen keıin nemese shaǵymdaný merzimi ótken soń belgili bolady.
Bazardyń ornyna ne salynbaq?
2025 jyldyń jazynda Almaty oblysynyń ákimi Marat Sultanǵazıev jer telimi memleketke qaıtarylǵan soń, onyń ornynda ındýstrııalyq aımaq qurý josparlanyp otyrǵanyn aıtqan bolatyn. Onyń sózinshe, aýmaqty paıdalanýdyń birneshe nusqasy qaralǵan, biraq óndiristi damytýǵa basymdyq berilgen.
— Bul óte yńǵaıly oryn. Alaıda bazar aýmaǵynyń birneshe menshik ıesi bar jáne olardyń keıbirimen sot protsesteri júrip jatyr. Eger biz isti jeńip, 36 gektardan astam jer telimin oblys qaramaǵyna qaıtara alsaq, bul jerde ónerkásiptik ındýstrııalyq aımaq qurý josparda bar, - dedi óńir basshysy.
«Barys» avtobazarynyń taǵdyry sot protsesteriniń aıaqtalýyna baılanysty. Eger qalǵan aýmaq memleket menshigine birjola ótse, ony paıdalaný boıynsha naqty josparlar bekitiledi. Ázirge bazar úırenshikti tynys-tirshiligin jalǵastyryp jatyr. Munda áli de kólikter satylyp keledi, ashanalar jumys istep tur.
Eske salaıyq, 2023 jyly sot «Barys» avtokólik bazarynyń jer ýchaskelerin satyp alý-satý shartyn jaramsyz dep tanydy.
