Qostanaıdaǵy qus fabrıkasyna qatysty tergeý bastaldy

QOSTANAI. QazAqparat - Qostanaıdaǵy «Jas qanat-2006» qus fabrıkasyna qatysty tergeý bastaldy. Bul týraly Básekelestikti qorǵaý jáne damytý agenttiginiń Qostanaı oblysy boıynsha departamentinen málim etti, dep habarlaıdy QazAqparat tilshisi.

Vedomstvonyń deregine qaraǵanda, «Jas qanat-2006» JShS qus fabrıkasy Qazaqstannyń básekelestikti qorǵaý salasyndaǵy zańnamasyn buzǵan.

«Kásipkerlik kodeksiniń 174-baby 1) tarmaqshasyn buzý belgileri boıynsha Qostanaı oblysyndaǵy qus fabrıkasyna qatysty tergeý bastady. Atap aıtqanda, JShS jumyrtqany kóterme satý kezinde monopolııalyq joǵary baǵalardy belgilep, ustap turý bóliginde ústem jaǵdaıdy teris paıdalanǵan», - delingen habarlamada.

Bir jyl buryn departament qostanaılyq eki qus fabrıkasynyń jumysynda Kásipkerlik kodeksin buzý belgilerin tirkegen bolatyn, onyń ishinde «Jas qanat-2006» JShS da bar.