Qostanaıda kún elektr stantsııasy iske qosyldy
ASTANA. KAZINFORM — Qostanaı oblysynda qýaty 22,6 MVt kún elektr stantsııasynyń (KES) qurylysy aıaqtaldy. Joba Soltústik Qazaqstandaǵy eń iri jańartylatyn energııa nysanyna aınaldy, dep habarlaıdy Ónerkásip komıtetiniń baspasóz qyzmeti.
Stantsııany saltanatty túrde iske qosý rásimine Ónerkásip komıtetiniń tóraǵasy Azamat Panbaev qatysyp, jobanyń óńirlik energetıka men ónerkásiptiń turaqty damýy úshin mańyzdylyǵyn atap ótti.
— Kún elektr stantsııasy kompanııanyń dekarbonızatsııa baǵdarlamasy aıasynda salynyp, «Varvarınskoe» AQ-tyń «jasyl» elektr energııasyna kóshýine baǵyttalǵan. KES jylyna shamamen 28,5 mln kVt·saǵ elektr energııasyn óndiredi, bul kásiporyndy kúndizgi ýaqytta jańartylatyn kózderden tolyq derlik qamtamasyz etýge múmkindik beredi. Joba aıasynda jalpy aýdany 98 000 m² bolatyn 36 000-nan astam kún paneli ornatyldy, — delingen habarlamada.
Sonymen birge joba quramynda qýaty 40 MVt bolatyn manevrlik gazoporshendi elektr stantsııasynyń (GPES) qurylysy qarastyrylǵan. Onyń iske qosylýy 2026 jylǵa josparlanǵan.
Gaz stantsııasy kún stantsııasynyń táýliktik óndirý kólemindegi ózgeristerdi teńestirip, «Varvarınskoe» AQ-tyń túngi, tańerteńgi jáne keshki ýaqyttaǵy energııa qajettiligin óteýge múmkindik beredi. Sondaı-aq pık saǵattarda AO «KEGOC» júıelik operatory úshin retteletin qýat beretin bolady. Bul — elde «jasyl» energııa óndirisi men manevrlik gaz stantsııasynyń qýatyn biriktiretin alǵashqy jobalardyń biri.
«Varvarınskoe» AQ-tyń taza energııa kózderine kóshýi kásiporynnyń janama parnıktik gazdar shyǵaryndylaryn 50%-ǵa qysqartady. Al Solidcore Resources toby boıynsha tikeleı jáne janama shyǵaryndylar 16%-ǵa tómendeıdi.
Jobany Solidcore Resources kompanııasynyń enshiles qurylymy — «Altyn Solar Energy» JShS júzege asyrýda. Bas merdiger — «Hi-Teck Qazaqstan» JShS. Qurylys kezeńinde 70 jumys orny ashylyp, stantsııa iske qosylǵannan keıin 16 turaqty jumys orny qamtamasyz etiledi.
Budan buryn Qostanaıda 6 temirjol vokzaly jóndelip jatqanyn jazdyq.