Qostanaıda kelesi jyly 25 myń kólik shyǵarylmaq
«Allıýr» Kompanııalary» tobynyń quramyna enetin Qostanaıdaǵy «SaryarqaAvtoProm» JShS bazasynda zamanaýı kólikterdi qurastyrý qolǵa alyndy. Osydan eki jyl buryn qytaılyq ChinaMachinerycompany kompanııasynyń qatysýymen JAC avtokóligi qurastyryla bastaǵan-dy. Eske salsaq, byltyr kúzde jumys saparymen Qostanaıǵa kelgen Elbasy Nursultan Nazarbaev «SaryarqaAvtoProm» zaýytynda bolyp, kólik qurastyrýdyń jańa ádisimen tanysqan bolatyn.
Qazirdiń ózinde «SaryarqaAvtoProm» JShS 11 myńǵa jýyq avtokólik qurastyrǵan. «Saryarqa AvtoProm» JShS dırektorlar keńesiniń tóraǵasy Andreı Lavrentevtiń aıtýynsha, kelesi jyly oblysta 25 myń kólik shyǵarylady.
Qostanaılyq mashına qurastyrýshylar qatty turmystyq jáne ónerkásiptik qaldyqtardy jınap, tasymaldaıtyn kólik shyǵarýdy qolǵa aldy.
«Biz qoqys tasıtyn kólikterge tapsyrys alǵan soń óndiriske 3 aı jumsaımyz. Mysaly, Astana qalasy jaqynda synama úshin bizdegi qoqys tasıtyn kólikterdi aldy. Bul tehnıkalar «eýro 5» ekologııalyq talaptaryna saı keledi. Eksportqa Reseı men Tájikstanǵa kóbirek shyǵady», - deıdi Andreı Lavrentev.
Almaty oblysynyń ákimi Amandyq Batalov Taldyqorǵan qalasynyń ákimine qoqys tasıtyn kólikterdi satyp alýǵa tapsyrma berdi. Sondaı-aq, almatylyqtar Qostanaıdan shyǵarylatyn qoǵamdyq kólikterge qyzyǵýshylyq tanytyp otyr.
Mashına zaýytyndaǵy kezdesý barysynda Amandyq Batalovqa Qostanaı oblysynyń atynan «Peugeot 301» avtokóligi tabys etildi. Óz kezeginde Amandyq Batalov kóliktiń oblystyq balalar úıine beriletinin aıtty.
Arhımed Muhambetov almatylyq meımandarǵa «Tobyl» fýtbol klýbynyń jańadan salynyp jatqan stadıonyn kórsetti. «Tobyl-Arena» alańynyń ústin membrana shatyry jabady. Onyń tómengi bóliginde jylý oqshaýlaǵyshy bar.
«Biz alań qurylysyna Slovenııanyń ónimderin paıdalandyq. Olardyń sapasyna, salmaǵyna mán berdik. Jabyq alańnyń bıiktigi - 27 metr. ÝEFA-nyń barlyq standartyna jaýap beredi. Bul alańda oblys deńgeıindegi kontserttik baǵdarlamalardy ótkizemiz», - dedi Arhımed Muhambetov.
Búgin Almaty jáne Qostanaı oblystary ózara áriptestik týraly memorandýmǵa qol qoıdy.
Nátıjesinde, Almaty oblysy Qostanaıdan «Belarýs» markaly 50 shaqty traktor, «SaryarqaAvtoProm» zaýytynan 35 avtobýs satyp almaq. Atalǵan tehnıkalar lızıng arqyly iske asýy múmkin.
