Qostanaıda «Aýyl 4.0» jobasy engizilmek

QOSTANAI. QazAqparat - Qostanaıda aýyldyq eldi mekenderdegi halyq turmysynyń sapasyn kóterýge baǵyttalǵan «Aýyl 4.0» jobasy engiziledi. Bul týraly búgin «Nur Otan» partııasy oblystyq fılıaly Saıası keńesiniń keńeıtilgen otyrysynda aıtyldy, dep habarlaıdy QazAqparat.

Partııa jıynynda oblystyq ekonomıka jáne bıýdjettik josparlaý basqarmasy basshysynyń mindetin atqarýshy Almagúl Bekbaeva baıandama jasady. Onyń aıtýynsha, bıyl aýyldyq mekenderdi damytýǵa arnalǵan «Aýyl - el besigi» arnaıy jobasy qolǵa alynbaq. Arnaıy joba aýyldarda turmys sapasyn kóterýge baǵyttalǵan. Bul joba aıasynda aldaǵy 3 jyl ishinde 90 mlrd teńge qarjy jumsalmaq. Arnaıy jobanyń basty maqsaty - aýyldyń áleýeti men áleýmettik-ekonomıkalyq ınfraqurylymyn damytý.

«Oblysta 548 aýyldyq meken bar. Oblys turǵyndarynyń 45%-y aýyldarda turady. Búginde atalǵan 151 aýyl bolashaǵy bar perspektıvaly aýyl sanatyna irikteldi. Osy eldi mekenderdi damytýǵa el qazynasynan 1,5 mlrd teńge bólindi. Bul qarjy memlekettik jáne áleýmettik qyzmet kórsetýdi, sondaı-aq óndiristik jáne áleýmettik ınfraqurylymdy damytýǵa jumsalady. Aldaǵy ýaqytta aýyl turǵyndarynyń ómir súrý sapasyn jaqsartýǵa baǵyttalǵan «Aýyl 4.0» jańa standarty engiziledi. Aýyldyq aýmaqtardyń áleýmettik-ekonomıkalyq ınfraqurylymyn jańǵyrtý da osy jobanyń maqsatyna kiredi», - deıdi Almagúl Bekbaeva.

Jıynda monoqalalardy damytý máseleleri de sóz etildi. Aldaǵy úsh jyl ishinde shaǵyn qalalalardy damytýǵa jyl saıyn 10 mlrd teńge bólinetin bolady. Bul qarjy negizinen ınjenerlik-kommýnıkatsııalyq ınfraqurylymdy jaqsartýǵa jumsalmaq. «Oblystaǵy 4 shaǵyn qala: Rýdnyı, Lısakov, Jitiqara, Arqalyqta óńir halqynyń 27%-y turady. Bul qalalardyń áleýeti iri ken óndirýshi kásiporyndarǵa táýeldi. Bıyl atalǵan qalalardyń ınjenerlik-kommýnıkatsııalyq ınfraqurylymyn damytýǵa arnalǵan 15 joba qolǵa alynady. Oǵan 3 mlrd teńgege jýyq qarjy qarastyrylǵan», - deıdi baıandamashy.

Sonymen qatar, qalalarǵa jaqyn aýyldardy ekonomıkalyq turǵyda damytý kózdelýde. Qazirgi tańda oblys ortalyǵy men shaǵyn qalalarǵa jaqyn 23 aýyl anyqtaldy. Olarda 50 myńǵa jýyq adam turady.

Aıta keteıik, Elbasy Nursultan Nazarbaev «Nur Otan» partııasynyń XVIII sezinde kishi jáne monoqalalardy damytý úshin de jylyna 10 mlrd teńgeden úsh jyl boıy qosymsha qarajat bólinetinin aıtqan bolatyn .