Qostanaı oblysynda taǵy eki PTR-zerthana ashyldy

QOSTANAI. QazAqparat – Qostanaıda Arhımed Muhambetovtiń tóraǵalyǵymen koronavırýs ınfektsııasynyń taralýyna jol bermeý jónindegi jedel shtab otyrysy ótti, dep habarlaıdy QazAqparat oblys ákiminiń baspasóz qyzmetine silteme jasap.

Oblys ákimi koronavırýstyń óńirde taralýyna jol bermeý boıynsha júrgizilip jatqan jumystarǵa toqtaldy. Onyń aıtýynsha, qazir 2158 tósek-oryn qosymsha daıyndaldy, onyń ishinde 1704-i - provızorlyq statsıonarda.

«Sońǵy 2 aptada pnevmonııamen aýyrý ótken kezeńmen salystyrǵanda 5 ese tómendedi. Sondaı-aq jedel járdem qyzmetin shaqyrý sany 1 600-den 750-ge deıin azaıǵany baıqalady. Oblysta KVI dıagnostıkasy 5 zerthanada júrgiziledi. Veterınarlyq zerthana fılıaldarynyń bazasynda búginnen bastap 2 PTR-zerthana jumys isteı bastady. Koll-ortalyq jumysy kúsheıtildi, shtat eki ese ulǵaıdy. Jumys demalyssyz júrgiziledi. Qońyraý sany kúnine 180-den 120-ǵa deıin tómendedi. Emhanalardyń janynan patsıentterge úıde medıtsınalyq kómek kórsetetin 160 mobıldi ámbebap brıgada quryldy», - dedi oblys basshysy.

Sondaı-aq, Arhımed Muhambetov oblysta karantınniń saqtalýyna baqylaý kúsheıtilgenin atap ótti. Oblystaǵy monıtorıng toptarynyń sany 44-ten 91-ge deıin kóbeıdi.

Osy jyldyń 1-30 shilde aralyǵynda monıtorıng toptary 2099 menshik nysanyn tekserdi. 118 zańbuzýshy anyqtalyp, hattama toltyryldy.

Іshki ister qyzmetkerleri lokdaýn rejımin buzǵan 1680 adamǵa eskertý jasady.