Qosshyda qos mekteptiń qurylysy júrip jatyr

ASTANA. QazAqparat – Qosshy qalasynda eki mektep salynyp jatyr. Bul týraly Aqmola oblysy men Astanadaǵy mektepter qurylysynyń barysymen jáne «Jaıly mektep» jobasy aıasynda salynatyn nysandardy jobalaýmen tanysqan Oqý-aǵartý mınıstri Ashat Aımaǵambetov málim etti, dep habarlaıdy QazAqparat.

«Qosshyda bıylǵy qyrkúıek aıynda 1 200 oryndyq mektep paıdalanýǵa berildi. Qazir munda taǵy eki jańa mektep salynyp jatyr. Olar 2023 jyldyń jazyna deıin paıdalanýǵa beriledi dep josparlanyp otyr. Qurylys jumystarymen tanystym. Prezıdenttiń tapsyrmasymen ázirlengen «Jaıly mektep» jobasy aıasynda kelesi jyly 11 000 oryndyq taǵy 3 mekteptiń qurylysy bastalady (eki aýysym). Bul oqýshylar ornynyń jetispeýshiligi máselesin tolyǵymen sheshýge múmkindik beredi», - dep jazady mınıstr áleýmettik jelidegi paraqshasynda .

Vedomstvo basshysy zańdy túrde mektep salý jáne oǵan bıýdjetten qarjy bólý ákimdikterdiń quzyrynda ekenin alǵa tartady.

«Olardy jobalaý, qurylys mekemelerin tańdaý jumystarymen de jergilikti qurylys basqarmalary aınalysady. Alaıda, bul máseleni baqylaýda ustaý mańyzdy», - deıdi Ashat Aımaǵambetov.

Sonymen birge, 2023 jyly «Jaıly mektep» jobasy aıasynda Talapker aýylynda 4 800 oryndyq eki mektep, Qajymuqan aýylynda 1 800 oryndyq bir mektep salý josparda bar (eki aýysym).

«Bul oqýshy ornynyń tapshylyǵy máselesin tolyǵymen sheshedi. Sonymen qatar, Úrkerdegi №69 mektep-gımnazııasynda da boldym. Oqý kabınetterin, psıhologııalyq-pedagogıkalyq túzetý, robototehnıka kabınetterin aralap shyqtym. Muǵalimdermen áńgimelestim. Bul mektepte 28 bala ınklıýzıvti bilim alady. Mektep úsh aýysymdy. Oǵan jaqyn jerden 2023 jyly «Jaıly mektep» aıasynda 2 000 oryndyq jańa mekteptiń qurylysy bastalady», - dep atap ótedi mınıstr.