Koronavırýsqa kimder tegin test tapsyra alady

NUR-SULTAN. QazAqparat – «Áleýmettik medıtsınalyq saqtandyrý qory» KEAQ Basqarma tóraǵasynyń orynbasary Marat Shoranov koronavırýs ınfektsııasyna kimder tegin test tapsyra alatynyn aıtty, dep habarlaıdy QazAqparat.

Áleýmettik jelide onlaın rejımde ótken baspasóz máslıhatynda Mindetti áleýmettik medıtsınalyq saqtandyrý boıynsha saqtandyrylǵan adamdar koronavırýsqa testini qashan tapsyra alatyndyǵy týraly saýal joldandy.

«Koronavırýs asa qaýipti ınfektsııalar tobyna jatady. Sáıkesinshe, elde tıisti sharalar qabyldanady. Qazirgi kezde testiler tapsyrý múmkindigi júzege asyrylǵan. Tıisti qarjy bastapqy medıtsınalyq-sanıtarlyq kómek kórsetetin uıymdarǵa jetkizildi. Aýrý belgileri baıqalsa, ıaǵnı dene qyzýynyń kóterilýi, qurǵaq jótel jáne basqa da belgiler kezinde bastapqy medıtsınalyq-sanıtarlyq kómek deńgeıinde testileý júrgizýge bolady. Sonymen qatar, eger adam provızorlyq, ınfektsııalyq nemese karantındik statsıonarǵa tússe, onda emdeý hattamasy boıynsha atalǵan testilerdi tolyqtaı tegin ótedi», - dedi M. Shoranov.

Osy oraıda ol búginde testiden ótý múmkindigi qamtamasyz etilgenin aıtty.

«Jalpy, bas sanıtarlyq dárigeriniń qaýlysy boıynsha mindetti túrde testileýden ótetin patsıentter sanaty bar. Bul turǵyda júkti áıelder, sondaı-aq endokrındi, kardıologııalyq ári pýlmonologııalyq bólimderge túsetin adamdar qamtylǵan», - dedi Marat Shoranov.