Koronavırýs: Italııada 116 dáriger qaıtys boldy

RIM. ANSA-QazAqparat – Seısenbi kúni Italııada koronavırýstan taǵy tórt dáriger kóz jumdy. Osylaısha, elde indetten qaıtys bolǵan dárigerler sany 116-ǵa jetken. Bul týraly ANSA-ǵa silteme jasap QazAqparat habarlaıdy.

FNOMCEO dárigerler gıldııasy federatsııasynyń málimdeýinshe, vırýstan Lýıdjı Chırıottı (zeınet jasyndaǵy otbasylyq dáriger), Sebastıano Karbe (zeınet jasyndaǵy dáriger), Maýrıtsıo Bertachchını (otbasylyq dáriger) jáne Domenıko Fatıka (stomatolog) qaıtys boldy. Kóz jumǵandar arasynda koronavırýs juqtyrǵan patsıentter sanynyń kóbeıýine, sondaı-aq medıtsınalyq qyzmetkerlerdiń jetispeýine baılanysty jumysqa oralýǵa týra kelgen zeınetker dárigerler bar.

Assofarm prezıdenti Venantsıo Djızzı koronavırýstan qaıtys bolǵan ıtalııalyq farmatsevter sanynyń 8 adamǵa jetkenin qosyp aıtty. Sońǵy kóz jumǵan farmatsevt - Antonıo Tıllı Florentsııa mańyndaǵy Pontassevede mýnıtsıpaldyq dárihana dırektory bolǵan.