Koronavırýs: Elorda turǵyndaryna ekspress testileý júrgiziledi
NUR-SULTAN. QazAqparat - Elorda turǵyndaryna aldaǵy eki aptada koronavırýs ınfektsııasyna ekspress testileý júrgiziledi. Bul týraly Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qısyqova aıtyp berdi, dep habarlaıdy QazAqparat tilshisi.
«Halyq arasynda koronavırýs ınfektsııasyna ekspress testileý júrgizý jaqyn aradaǵy eki aptaǵa josparlanǵan. Qazir koronavırýs ınfektsııasynyń taralýy osy máselege jaýapty vedomstvolar men organdardyń baqylaýynda. Qazirgi ýaqytta koronavırýs ınfektsııasyn dıagnostıkalaý Polımerazdy tizbektik reaktsııa ádisimen naýqastarmen baılanysta bolǵandarǵa jáne juqtyrý qaýpi joǵary adamdarǵa ǵana júrgiziledi», - dedi basqarma basshysy qala ákimdiginde ótken onlaın brıfıngide.
Buǵan deıin basqarma basshysy Nur-Sultanda kornavırýs juqtyrǵandardyń basym bóligi 30-49 jas aralyǵynda ekenin málimdegen edi.
Nur-Sultan qalasy boıynsha tirkelgen barlyq 25 jaǵdaı boıynsha jaqyn baılanysta bolǵan 244 adam Nur-Sultan men ózge óńirlerdegi aýrýhanalarǵa jatqyzyldy.
Eske sala ketsek, Qazaqstanda qazir koronavırýs ınfektsııasyn juqtyrǵandar 49 adam boldy. Almatyda – 22 adam, Qaraǵandy qalasynda - 2 adam, Nur-Sultanda - 25 adam tirkelgen.
