Qorǵanys mınıstrliginde tsıfrlyq jobalar tanystyryldy
ASTANA. KAZINFORM — Qorǵanys mınıstrliginde Tsıfrlandyrý jáne ІT qyzmetkerleri kúni qarsańynda vedomstvonyń negizgi tsıfrlyq jobalary tanystyryldy. Sharada áskerdi basqarý, shaqyrý, daıarlaý jáne oqytý protsesin ózgertetin sheshimder kórsetildi. Bul týraly vedomstvonyń baspasóz qyzmeti málim etti.
Qorǵanys mınıstriniń tsıfrlandyrý jónindegi orynbasary Darhan Ahmedıevtiń aıtýynsha, tsıfrlyq transformatsııa – Prezıdent aıqyndaǵan strategııalyq baǵyttardyń biri.
– Qazirgi armııa – bul tek kúsh pen qýat emes, eń aldymen ıntellekt, – dedi ol.
Kórme aımaǵynda 16 ınteraktıvti alań jumys istedi. Qatysýshylar tsıfrlyq servısterdiń jumysyn naqty ýaqyt rejıminde kórdi.
Negizgi jobalar:
- «Smart áskerı komıssarıat» — shaqyrý týraly SMS-habarlamalar, avtomatty tirkeý, keıinge qaldyrýdy onlaın rásimdeý. Jaqyn ýaqytta medıtsınalyq tekserý de tsıfrlanady.
- Kelisimshart boıynsha qyzmetke onlaın qabyldaý — Jauynger.gov.kz portaly arqyly. Áskerı-tehnıkalyq mamandyqtar boıynsha oqýǵa kezekke qoıý jáne joldaý júıesi avtomattandyryldy.
- Sarbaz 2.0 — merzimdi áskerı qyzmetshilerdiń jetistikterin tirkeıdi, bilim granttaryn ádil bólýge kómektesedi.
- Biryńǵaı bilim berý platformasy Askeri Ziyat — Qorǵanys mınıstrliginiń kolledjderi men JOO-na onlaın ótinim berý múmkindigi.
- ARMIA.KZ — áskerı qyzmet máseleleri boıynsha «tsıfrlyq keńesshi». Ol zańnama ózgergen jaǵdaıda málimetterdi avtomatty túrde jańartady.
- «Bes qarý» jobasy — jasandy ıntellekt áskerı daıyndyq nátıjelerin taldap, atys, dene daıarlyǵy jáne arnaıy pánder boıynsha jeke usynystar beredi.
2025 jyldyń sońyna deıin kadrlyq esep júıesinde is-sapar, demalys bıletteri, zattyq attestat jáne áskerı ataq merzimin kórsetetin ındıkator sekildi segiz jańa modýl iske qosylady.
Mınıstrlikte tsıfrlyq sheshimder ýaqytty únemdep, bıýdjet shyǵyndaryn qysqartyp, adamı faktordy azaıtatyny atap ótildi.
Aıta keteıik, buǵan deıin senator Andreı Lýkın óziniń depýtattyq saýalynda áskerı tártip pen áskerı polıtsııanyń jumysyn retteıtin zańdardy qaıta qaraý qajet ekenin aıtqan edi.