Qazaqstan Barysy Grand Slam týrnırinde Olımpıada chempıondary baq synaıdy
ASTANA. KAZINFORM — Astanada 8-10 mamyr kúnderi ótetin Qazaqstan Barysy Grand Slam 2026 álemdik reıtıngilik týrnırine dzıýdo sportynyń maıtalmandary qatysady.
Qazaqstan dzıýdo federatsııasynyń baspasóz qyzmetinen málim etkenindeı, elimizde tórtinshi ret uıymdastyrylǵaly otyrǵan jarysta Jaqsylyq Úshkempirov atyndaǵy jekpe-jek saraıynyń tatamıine Olımpıada chempıondary men júldegerleri, álem chempıondary jáne álemdik reıtınginiń kóshbasshylary shyǵady.
Olardyń qatarynda Rıo Olımpıadasynyń chempıondary Rafaela Sılva (Brazılııa) men Fabıo Bazıl (Italııa), Parıj Olımpıadasynda úzdik shyqqan álemniń eki dúrkin chempıony Barbara Matıch (Horvatııa), úsh márte álem chempıony, Grand Slam týrnırleriniń on dúrkin jeńimpazy Inal Tasoev bar. Sondaı-aq Tokıo Olımpıadasynyń kúmis júldegeri ıAn ıÝn-Veı (Taıbeı), Parıjde ekinshi oryn alǵan Ýıllıan Lıma (Brazılııa) men Mırıam Býtkereıt (Germanııa), Parıjde qolaǵa qol jetkizgen, oǵan qosa álem chempıonatynyń kúmis júldegeri Ǵusman Qyrǵyzbaevty (Qazaqstan) jáne basqalardy aıtýǵa bolady.
IJF talaptaryna sáıkes jarys qorytyndysy boıynsha jeńimpazdar men júldegerlerge álemdik jáne Olımpıadalyq reıtıng upaılary úlestiriledi. Atap aıtqanda, chempıonǵa – 1000, kúmis júldegerge – 700, úshinshi orynǵa 500 upaı beriledi.
Qazaqstan Barysy Grand Slam 2026 týrnırinde sportshylar 2028 jyly Los-Andjeleste ótetin jazǵy Olımpıada oıyndaryna joldama alýǵa múmkindik beretin mańyzdy upaılar jınaıdy.
Qazaqstan dzıýdo federatsııasy men Halyqaralyq dzıýdo federatsııasynyń (IJF) 2023 jyly qol qoıǵan ekijaqty kelisimshartyna sáıkes Qazaqstan álemdik Grand Slam jarysyn 2026 jylǵa deıin qabyldaıdy. Al 2027 jyly Astana dzıýdodan álem chempıonatyn ótkizedi. Bul elimizdiń iri halyqaralyq jarystardy turaqty túrde qabyldap, álemdik dzıýdo kartasyndaǵy bedelin nyǵaıtyp kele jatqanyn aıqyndaıdy.
Eske sala keteıik, budan buryn Astanadaǵy Grand Slam týrnırine qatysatyn dzıýdoshylar belgili bolǵanyn jazǵan edik.
