Qorǵaljyn qoryǵyndaǵy órt sóndirildi

KÓKShETAÝ. QazAqparat – Aqmola oblysynyń Qorǵaljyn qoryǵy aýmaǵyndaǵy Sarykól kólinde tutynǵan qamys órti sóndirildi, dep habarlaıdy QazAqparat tilshisi oblystyq TJD baspasóz qyzmetine silteme jasap.

«Osydan birer kún buryn «Qorǵaljyn qoryǵy» memlekettik tabıǵı parkiniń aýmaǵyndaǵy Sarykól kólinde tutanǵan qamys órti 19 maýsym kúni saǵat 06:40 sóndirildi. Qyzyl jalyn 150 gektar aýmaqty sharpydy. Qatty jel jáne sý-batpaq órt sóndirýshlerge biraz qıyndyqtar týyǵyzdy. Sol sebepti, órtti sóndirý áýeden júzege asyryldy. Órttiń dala massıvine taralýyna jol bermeý úshin, jerdegi kúshter baqylaý júrgizdi», - dedi vedomstvodan.

TJD baspasóz qyzmetinen atap ótkendeı, órtti sóndirýge Qorǵaljyn qoryǵynyń qyzmetkerleri, Aqmola oblysy men Astana qalasynyń TJD jeke quramynan 78 adam jáne 23 tehnıka, sondaı-aq, «Qazavıaqutqarý» AQ MI-8 eki tikushaǵy jumyldyryldy. Tilsiz jaýdy aýyzdyqtaý úshin 600 tonnadan astam sý shashyldy.

Aıta ketsek, budan buryn Qorǵaljyn aýdanyndaǵy órtti sóndirýge tikushaq jumyldyrylǵanyn jazǵan edik.