Kópshilik aldynda adamdardy alalaý, óz pikirin qasaqana tyqpalaý ádeptilikke jatpaıdy – Erlan Qarın
ASTANA. KAZINFORM – Prezıdent Ákimshiligi basshysynyń birinshi orynbasary Erlan Qarın eldik ustanymdarǵa qaıshy keletin áreketterge qoǵam bolyp tosqaýyl qoıý qajet ekenin aıtty.
– Toıda tilekke shyǵyp, ersi ýaǵyz aıtyp ketken er adamnyń vıdeosyn jeliden kórip qaldym. Shyn máninde, onyń áıelderdi kemsitýi, ánshilerge, mýzyka ónerine qatysty teris pikir bildirýi bolmysymyzǵa múldem jat. Ulttyq tanym-túsinikke sáıkes kelmeıdi. Óıtkeni Qazaqstan – zaıyrly memleket. Bizdiń temirqazyǵymyz – Konstıtýtsııa. Birinshi orynda dinı shekteýler emes, elimizdiń zańdary turady, - dep jazdy Erlan Qarın áleýmettik jelidegi paraqshasynda.
Sonymen qatar óner men mádenıetti dinge qarsy qoıý da asyra silteýshilik ekenin atap ótti.
– Memleketimiz tańdaǵan jol bul emes. Kerisinshe, elimiz bilim men ǵylymǵa, óner men mádenıetke basymdyq berip keledi. Kópshilik aldynda adamdardy bulaısha alalaý, óz pikirin qasaqana tyqpalaý ádeptilikke jatpaıdy. Biz ózara qurmet pen mádenıetti bıik qoıamyz. Elimizdiń jańa qoǵamdyq etıkany qalyptastyrýǵa erekshe mán berip otyrǵany da sondyqtan. Sol sebepti ulttyq bolmys pen eldik ustanymdarǵa qaıshy keletin mundaı áreketterge qoǵam bolyp tosqaýyl qoıýymyz qajet, - dedi Prezıdent Ákimshiligi basshysynyń birinshi orynbasary.
Aıta keteıik, áleýmettik jelide toıda tilektiń ornyna ýaǵyz aıtqan adamnyń beınejazbasy taraǵan bolatyn. Onyń sózi kópshilik arasynda synǵa ushyrady. Jeli qoldanýshylary onyń toıǵa túrli shekteý qoıý týraly, atap aıtqanda mýzykany múlde alyp tastaý, er men áıeldi bólek otyrǵyzý týraly aıtqanyn jáne áıelderdi «urǵashylar» degenin orynsyz dep baǵalaǵan.
Erlan Qarın jańa qoǵamdyq etıkany qalyptastyrý ulttyń damýy men órkendeýiniń negizgi alǵysharttarynyń biri ekenin aıtqan edi.
