Konstıtýtsııalyq reformalar qoǵamdyq ómirge jańa tulǵalardyń kelýine sebep boldy — Qarın
ASTANA. KAZINFORM — Qazaqstan múlde jańa turpatty elge aınaldy. Bul týraly búgin Quryltaı otyrysynda Vıtse-prezıdent Erlan Qarın málim etti.
— Sońǵy bes-jeti jylda elimiz qaı jaǵynan bolmasyn aıtarlyqtaı ózgerdi. Ózińiz aıtyp júrgendeı, Qazaqstan múlde jańa turpatty elge aınaldy. Kóptegen salada aýqymdy jáne tereń ózgerister júrip jatyr. Onyń oń nátıjesin halqymyz óz kózimen kórip, seze bastady. Sizdiń qoldaýyńyzben jáne senimińizdiń arqasynda eldegi osyndaı úlken tarıhı ózgeristerdiń ortasynda júrýge múmkindik aldyq. Qurmetti Qasym-Jomart Kemeluly, ózińiz jıi aıtatyn bir sóz bar: «Árbir azamat úshin elge qyzmet etý — úlken baqyt ári zor mártebe». Maǵan da osy jyldary osyndaı múmkindik berip, senim bildirgenińiz úshin úlken alǵys aıtam! Qandaı qyzmette bolsaq ta, árdaıym ózińiz aıqyndaǵan mindetterdi adal atqaryp, Qazaqstannyń bolashaǵy úshin eńbek etýge bar kúshimdi salýǵa ýáde beremin, — dedi Erlan Qarın.
Osy oraıda ol jańa Konstıtýtsııamen Qazaqstan tarıhynda jańa dáýir bastalǵanyn atap ótti.
— Endigi maqsat — jańa konstıtýtsııalyq qundylyqtardy qoǵamdyq ómir qaǵıdatyna aınaldyryp, qoǵamdyq sanada ornyqtyrý. Keshegi ótken Quryltaı saılaýy, eldegi Konstıtýtsııalyq reformalar qoǵamdyq ómirge kóptegen jańa esimderdiń, jańa tulǵalardyń kelýine sebep boldy. Qurmetti Qasym-Jomart Kemeluly, bastamańyzben elde bolyp jatqan oń ózgerister otanshyl, memleketshil azamattardyń bárine osyndaı aýqymdy jumystarǵa aralasýǵa jol ashyp otyr. Osy tarıhı sátte barlyq el azamatyn Prezıdentimizdiń aınalasyna toptasyp, judyryqtaı jumyla túsýge shaqyramyn, — dedi Erlan Qarın.
Budan buryn habarlanǵandaı, búgin Quryltaı otyrysynda depýtattar Vıtse-prezıdent laýazymyna usynylǵan Erlan Qarınniń kandıdatýrasyn qoldady.
Aıta keteıik, Vıtse-prezıdentti Prezıdent taǵaıyndaıdy. Biraq oǵan Quryltaıdyń kelisimi kerek. Osy oraıda búgin Quryltaı otyrysynda Memleket basshysy Qasym-Jomart Toqaev Vıtse-prezıdent laýazymyna Erlan Qarınniń kandıdatýrasyn usyndy.
