Qonaevtaǵy bazarda merzimi ótken azyq-túlik satylǵan

QONAEV.KAZINFORM - Qonaev qalasynyń turǵyndary «Alǵa» bazaryndaǵy retsiz ári las saýda oryndaryna áleýmettik jelide shaǵymdandy.

Atalǵan jaǵdaıǵa baılanysty qala ákiminiń úkimimen quramyna veterınarlyq ınspektsııa, zerthana, jer qatynastary, kásipkerlik, ishki saıasat bólimderiniń mamandary kirgen monıtorıngtik top quryldy. Senbi kúni bul top bazardaǵy baryp, ondaǵy jármeńkeni teksergen. Nátıjesinde bazardyń demalys kúnderi jármeńke ótkizý oryny retinde bekitilmegeni, taýardyń qujatsyz satylý jáne merzimi ótken shujyqtar men túrli táttilerdi, azyq-túlikti «úı janýarlaryna arnalǵan taǵam» retinde satý derekteri tirkelgen.

— Bazar basshylyǵyna qatysty turaq sanynyń jetkiliksizdigi, satýshylarǵa jaǵdaı jasalmaýy, jabyq pavılondardyń joqtyǵy jáne bazar aýmaǵy standarttarǵa sáıkes kelmeýi týraly uıǵarym shyǵaryldy. Monıtorıngtik toptyń bul aqparaty ary qaraı sharalar qabyldaý úshin sanıtarlyq-epıdemıologııalyq baqylaý basqarmasyna jiberiledi, — dep habarlady ákimdikten.

Sondaı-aq Qonaev ákimdiginiń málimetinshe, bazar turǵan jer 11 ýchaskege bólingen, ıeleri de ártúrli. Qysqy maýsymda senbi kúngi jármeńkede 100-120 orynda saýda jasalady. Jazdyń kúni bul kórsetkish 150-ge jetedi. Satýshylardyń kóbi Alataý qalasynan, Talǵar aýdanynan keledi.

Eske salaıyq, buǵan deıin Pavlodardaǵy dúkende merzimi ótken shujyq pen kúnbaǵys maıy satylǵanyn jazǵanbyz.