Kolýmbııanyń eks-prezıdentine qatysty qylmystyq is qozǵaldy
ASTANA. KAZINFORM – Kolýmbııanyń eks-prezıdenti Alvaro Ýrıbe 29 shildede sottta kýágerge qysym jasaǵany úshin kináli dep tanyldy. Bogota soty eks-prezıdenttiń túrmede otyrǵan burynǵy sarbazdy jalǵan kýálik berýge ıtermelegenin anyqtady, dep habarlaıdy DW.
Ýrıbe Kolýmbııany 2002–2010 jyldar aralyǵynda basqarǵan.
Sottyń málimdeýinshe, eks-prezıdent áskerı toptarmen baılanysy týraly tergeýde burynǵy mılıtarıst Djýan Gılermo Monsalveni ózine qarsy kýálik bermeýge májbúrlegen.
Bul Kolýmbııa tarıhyndaǵy alǵashqy jaıt bolyp otyr. Buryn-sońdy eks-prezıdentke qylmys jasaǵany úshin aıyp taǵylmaǵan. Ýrıbe 12 jylǵa deıin bas bostandyǵynan aıyrylýy múmkin.
Oqıǵa qalaı bastalǵan?
Qylmystyq is 2012 jyly konservatıvti saıasatker Ýrıbe solshyl senator Ivan Chepedany zańsyz qarýly toptarmen baılanysy bar dep aıyptaǵan kezde bastaldy. Alaıda Joǵarǵy sot Chepedany emes, Ýrıbeniń ózin tergeýge sheshim qabyldady.
Resmı tergeý 2018 jyly bastalyp, 2019 jyly myńdaǵan adam Bogota men Medellınde Ýrıbege qarsy qylmystyq istiń ashylýyna qarsy demonstratsııaǵa shyqty.
Degenmen, is bıyl, 2024 jyly qaıta ashyldy. Bul Lýz Kamargony prezıdent Gýstavo Petro (Kolýmbııa tarıhyndaǵy birinshi solshyl prezıdent) bas prokýror etip taǵaıyndaǵannan keıin boldy. Petronyń ózi burynǵy partızan jáne Ýrıbeniń saıası qarsylasy ekenin aıta keteıik.
Ýrıbeniń ótkeni men bedeli
Alvaro Ýrıbe Kolýmbııadaǵy uzaqqa sozylǵan azamattyq soǵys kezinde bılikte otyrǵan. Ol solshyl FARC búlikshiler tobyna jáne esirtki kartelderine qarsy qatal saıasatymen tanymal boldy. Onyń ornyna prezıdenttikke kelgen, burynǵy odaqtasy Hýan Manýel Santos 2016 jyly FARC -pen bitimgershilik kelisimge qol qoıdy, Ýrıbe muny «satqyndyq» dep baǵalady.
Eks-prezıdent qazir de Kolýmbııadaǵy konservatorlar arasynda tanymal saıasatker sanalady. Ol prezıdent Petro úkimetiniń qarýly toptarmen beıbitshilik áreketi sátsiz aıaqtalǵannan keıin pozıtsııasyn kúsheıtip aldy.
Alvaroǵa qatysty basqa da aýyr tergeýler júrip jatyr. Atap aıtqanda, ol 1997 jyly Antıohııa gýbernatory bolǵan kezde bolǵan aýyl turǵyndarynyń qyrǵynyna qatysty tergelýde. Sondaı-aq argentınalyqtar Ýrıbe áskerıleriniń 6 myń-nan astam beıbit turǵyndy óltirip, joǵalyp ketýine sebep bolǵany úshin shaǵymdanǵan. Ýrıbe ózine qarsy tergeýdi «saıası kek» dep ataıdy.
AQSh Memlekettik hatshysy Marko Rýbıo sot úkimin synap, Ýrıbeniń jalǵyz qylmysy – elin qorǵap, adal qyzmet etkenin aıtty.
– Kolýmbııanyń sot júıesin radıkaldy sýdıalardyń qarý retinde paıdalanyp jatqany alańdatady, - dedi Rýbıo.
Eske sala keteıik, Kolýmbııadaǵy kóshkin saldarynan mert bolǵandar sany 22 adamǵa jetti.