Kolledjderdiń 100 úzdik stýdenti marapattaldy
ASTANA.KAZINFORM — Astanada Jumysshy mamandyqtar jyly aıasynda «Qazaqstan Respýblıkasy kolledjderiniń 100 úzdik stýdenti» respýblıkalyq konkýrsynyń jeńimpazdaryn marapattaý rásimi ótti.
Oqý-aǵartý mınıstrligi uıymdastyrǵan aýqymdy sharaǵa elimizdiń barlyq óńirinen 100-den astam daryndy jáne bolashaǵy zor stýdent qatysty. Jobany júzege asyrýshy — «Talap» KeAQ.
Konkýrstyń maqsaty — tehnıkalyq jáne kásiptik bilim berý júıesindegi daryndy stýdentterdi anyqtaý jáne qoldaý, olardyń kásibı ósýine jaǵdaı jasaý jáne Qazaqstan ekonomıkasy úshin kadrlyq rezerv qalyptastyrý.
Jobanyń ereksheligi — júıeli tásilinde. Bul jaı ǵana jarys emes, stýdentterdi, bıznesti jáne memleketti biriktiretin, suranysqa ıe jańa býyn mamandaryn qoldaýǵa arnalǵan tuǵyrnama.
Taǵdyrdy ózgertetin konkýrs
Birinshi irikteý kezeńine elimizdiń 512 kolledjinen shamamen 2600 stýdent qatysty. Aımaqtyq kezeńniń qorytyndysy boıynsha 809 stýdent kelesi kezeńge ótti, al 100 úzdik respýblıkalyq deńgeıde jeńimpaz dep tanyldy. Qatysýshylar kadrlar daıarlaýdyń negizgi baǵyttary boıynsha baq synady: servıs, aqparattyq tehnologııalar jáne agroónerkásip. Bul konkýrs bilim men daǵdyny baǵalaý ǵana emes, sonymen qatar jas mamannyń tabysty mansabyna bastar jol boldy.
Bolashaqqa bastar kópir
Jeńimpazdar birqatar biregeı múmkindikterge ıe boldy: iri óńirlik kompanııalar men shaǵyn jáne orta bıznes tarapynan jumysqa ornalasý usynystary; startaptardy damytý jáne tulǵalyq ósý boıynsha trenıngterge qatysý; óńir ákimdikteri granty esebinen JOO-da oqýyn jalǵastyrý múmkindigi (qazirgi tańda kelissózder júrgizilýde); úzdik stýdentter jaıly ımıdjdik elektrondy jýrnalda jarııalaný.
Bıznes — kásiptik bilimniń basty seriktesi
— Búginde bıznes óndiristik protseske birden kirisýge daıyn quzyretti mamandarǵa muqtaj. «QR 100 úzdik stýdent» konkýrsy kolledjder men jumys berýshiler arasyndaǵy tıimdi áriptestiktiń jarqyn mysalyna aınaldy, — dedi «Talap» KeAQ basshysy Sanjar Tatıbekov.
Konkýrs qazaqstandyq kolledjderdiń joǵary deńgeıde maman daıyndaı alatynyn kórsetti. Jeńimpazdar qazirdiń ózinde «Allur» («SaryarqaAvtoProm»), «Qarmet», Rixos jáne Wyndham Garden Astana qonaqúıleri, «Kaztsınk» jáne basqa da kompanııalardan naqty jumys usynystaryn aldy.
«Jumysshy mamandyqtar — jasyl bolashaq úshin!»
Jumysshy mamandyqtar jyly aıasynda joba Memleket basshysy Qasym-Jomart Toqaevtyń bastamasymen uıymdastyrylǵan «Taza Qazaqstan» respýblıkalyq ekologııalyq aktsııasyna qoldaý kórsetti. Búgin «QR kolledjderiniń 100 úzdik stýdentine» qatysýshylar azamattyq jaýapkershiliktiń belgisi retinde «Birlik jáne kelisim» saıabaǵynda aǵash otyrǵyzdy.
Oılaý, bıznes jáne bolashaq: 100 úzdikke arnalǵan trenıngter
«100 úzdik stýdent» jobasy aıasynda stýdentter tek marapattalyp qana qoımaı, tulǵalyq jáne kásibı damý trenıngterine de qatysty. Bul sheberlik sabaqtary olardyń bolashaǵyna salynǵan mańyzdy ınvestıtsııa boldy, ıaǵnı:
1. «Oılaý quraldary — tabystyń sharty retinde» trenıngi:
Trenıngtiń maqsaty — stýdentterdiń kreatıvti, logıkalyq jáne syndarly oılaý daǵdylaryn damytý. Spıkerler qatarynda otandyq jáne halyqaralyq deńgeıdegi sarapshylar boldy: Madeev Sabyrjan — bilim berý júıesindegi baǵalaý boıynsha sarapshy, motıvatsııalyq trener, PhD. Ol jastarǵa senimdilik, maqsat qoıý jáne ishki motıvatsııany arttyrýdyń mańyzyn túsindirdi. Gın Anatolıı — TRIZ masteri, jasandy ıntellekt salasynyń sarapshysy, kreatıvti oılaý men pedagogıkalyq tehnıkalar jónindegi oqýlyqtardyń avtory. Ol qatysýshylarmen birge bolashaq mamanǵa qajetti «oılaý algorıtmderin» taldady. Qudaıbergenov Qýandyq Chıngızovıch — tarıhshy, ádisker, World Book of Records rekord kitabynyń bas ofıtseri. Óz sózinde ol tarıhı tulǵalardyń tabysqa jetý jolyndaǵy oılaý erekshelikterin taldap, jastardy ǵylym men ádistemelik oılaý mádenıetine baýlydy.
2. «Óz isin ashý úshin óz bıznes-startaptaryn damytý» trenıngi:
Kásipkerlikke qyzyǵýshylyq tanytqan stýdentterge arnalǵan bul trenıngte Aıbekov Eldos — «TjKB júıesine arnalǵan bıznes jáne kásipkerlik negizderi» oqý quralynyń avtory — stýdentterge startap qurý joldaryn, bıznes ıdeıany júzege asyrý jáne naryqqa shyǵý strategııalaryn túsindirdi. Praktıkalyq keıster men qarjylyq modeldeý arqyly qatysýshylar alǵashqy bıznes josparyn daıyndady.
3. «Halyqaralyq mıkrosertıfıkatsııa — mansapqa bastar qadamyń!»:
Bul trenıngte Jumaǵulov Berik, Certiport Pearson VUE (Ulyrıtanııa) kompanııasynyń jobalyq menedjeri, stýdentterge halyqaralyq IT jáne bıznes salasyndaǵy mıkrosertıfıkattardyń mańyzyn túsindirdi. Ol osy sertıfıkatsııalardyń eńbek naryǵyndaǵy bedeli men mansaptyq múmkindikter týraly aıtty. Stýdentter naqty sertıfıkattaý baǵyttarymen tanysyp, aldaǵy ýaqytta olardy qalaı alýǵa bolatynyn bildi.
Bul trenıngter tek bilim berip qoımaı, jastardyń oılaý kókjıegin keńeıtip, iskerlik pen mansaptyq baǵyt-baǵdaryn naqtylaýǵa kómektesti. Bul joba arqyly eldiń úzdik stýdentteri óz áleýetin ashyp, bolashaq tabys jolynda alǵashqy senimdi qadamdaryn jasady.
«QR kolledjderiniń 100 úzdik stýdenti» — bul jaı ǵana konkýrs emes
Bul — kásibı bilim berýdiń mańyzdylyǵyn moıyndaý, eńbek pen bilimge negizdelgen talant tek stýdenttiń ǵana emes, tutas eldiń bolashaǵyn ózgertýge qaýqarly ekenin dáleldeý.
Jeńimpazdardyń tolyq tizimi uıymdastyrýshylardyń resmı resýrstarynda jarııalanǵan.
Aıta ketelik elimizdiń kolledjderiniń úzdik stýdentteri anyqtalǵan edi.