«Kóktóbe» telemunarasy merekelik jaryqpen bezendiriledi

ALMATY. KAZINFORM – Búgin keshke Respýblıka kúnine oraı «Kóktóbe» telemunarasy merekelik jaryqtandyrýǵa qosylady.

«Qalanyń basty sımvoly ári kórikti orny Respýblıka kúnine oraı merekelik jaryq shamdarmen bezendiriledi. Sáýlettik jaryqtandyrý 24 qazan kúni saǵat 20:00-de qosylady. Almatylyqtar men qala qonaqtary merekelik quttyqtaýdy 24 jáne 25 qazan kúnderi kóre alady»,- dep habarlady ákimdikten.

Osyǵan deıin «Kóktóbe» telemunarasynda jaryqtandyrý tehnologııasy qalaı jumys isteıtini týraly jazǵan edik. 

Budan bólek, Almatyda Qazaqstan Respýblıkasy kúnin merekeleý kezinde 25 qazanda saǵat 21.00-de Abaı alańynda, Respýblıka Saraıynyń (Dostyq dańǵyly, 56) aldynda jáne 21.30-da «Astana» alańynda drondar shoýy ótedi.