«Kóktem-2012» komandalyq-shtabtyq oqý-jattyǵý BQO-da da ótedi
ORAL. 12 naýryz. QazAqparat - 15-16 naýryz aralyǵynda QR Tótenshe jaǵdaılar mınıstriniń jalpy basshylyǵymen «Kóktem-2012» respýblıkalyq komandalyq-shtabtyq oqý-jattyǵý bolmaq.
Oblystyq tótenshe jaǵdaılar departamentinen habarlanǵandaı, atalmysh shara bolýy múmkin sý tasqynynyń zardaptaryn joıý kezindegi qutqarý jáne basqa jedel jumystardy shıratý maqsatynda uıymdastyrylyp otyr.
BQO-daǵy oqý-jattyǵýǵa oblys ákiminiń birinshi orynbasary Ǵumar Dúısembaev basshylyq etpek. Birlesip áreket jasaý maqsatynda sharaǵa Reseı Federatsııasynyń Orynbor oblysynan tótenshe jaǵdaı qyzmetiniń ókilderi shaqyryldy.
Shara barysynda tótenshe jaǵdaılar jónindegi komıssııa otyrysy bolyp, Oral qalasynyń jedel jasaǵy, oblystyq sýda qutqarý qyzmeti jáne basqalarynyń daıyndyǵy pysyqtalady. Shaǵan sý qoımasynyń tasqynǵa ázirligi tekserilip, izdestirý-qutqarý jumystary júrgizilip, apatty jaǵdaıda ǵımarattan kóshirý jattyǵýlary jasalady.
