Kókshetaýda jeńil atlektıka maneji paıdalanýǵa berildi

KÓKShETAÝ. QazAqparat – Kókshetaýda Táýelsizdik kúni merekesine oraı qalpyna keltirý jumystary júrgizilgen jeńil atletıka maneji paıdalanýǵa berildi, dep habarlaıdy QazAqparat tilshisi.

Jeńil atletıka manejiniń irgesi sonaý 1989 jyly qalanǵan. Toqsanynshy jyldardyń basynda manej jekeniń qolyna ótken. Ony memleket menshigine qaıtarý máselesi kóterilgenine de kóp ýaqyt ótti. Nátıjesinde 2018 jyly manej joǵary sporttyq sheberlik mektebiniń balansyna berildi. Endi mine, elimizdiń basty merekesi – Táýelsizdik kúni qarsańynda esigin aıqara ashyp otyr. Nysannyń ashylýyna aımaq basshysy Ermek Marjyqpaev qatysyp, quttyqtaý sóz sóıledi.

«Biz búgin kórip otyrǵanymyzdaı, jeńil atletıka maneji qulpyryp shyǵa keldi. Bul nysan sportshylarymyzdyń jeńil atletıkaǵa qulshynysyn arttyrady», - dedi aımaq basshysy E.Marjyqpaev.

Nysannyń ashylýynda aımaq basshysy óńirde jeńil atletıkanyń damýyna eleýli úles qosqan Ábdrahman Ábdiráshıtov, Qazaqstan Respýblıkasynyń eńbegi sińgen jattyqtyrýshysy, Aqmola oblysynyń jeńil atletıkadan aǵa jattyqtyrýshysy Vasılıı Chýıko jáne KSRO-nyń sport sheberi, Almagúl Ádilovti marapattady.

Sonymen qatar, óńirde sportty damytýda azamattyq ustanym jáne yntymaqtastyq turǵysynan jaýapkershilik tanytqan Oleg Anısımovqa alǵys bildirldi.

Jańa nysanda Nur-Sultan qalasy, Soltústik Qazaqstan, Qostanaı jáne Aqmola oblystarynan kelgen sportshylardyń qatysýymen jarys ótýde. Onda 2002-2003 jyldar týǵan 200-ge jýyq jasóspirim 60 m, 200 m, 400 m, 800 m, 1 500 m, 3 000 m qashyqtyqqa júgirip, kúsh synasýda.