Kókshetaýda volonterler ortalyǵy ashyldy
Ortalyq qaladaǵy volonterler men «Fenıks» jáne «Lıder KZ» volonterlik qozǵalys ókilderiniń basyn biriktiredi.
Kókshetaý qalalyq mádenıet jáne tilderdi damytý bólimi, Azamattyq qorǵanystyń kópbeıindi joǵary kolledji jáne «Arna» Kókshetaýdyń joǵary kolledji arasynda ózara áriptestik týraly memorandýmǵa qol qoıyldy.
Uıymdastyrýshylardyń aıtýynsha, Kókshetaý qalalyq mádenıet jáne tilderdi damytý bóliminiń volonterleri tarıhı-mádenı murany saqtaýǵa, óńirlik, aımaqaralyq, respýblıkalyq mádenı-buqaralyq sharalardy uıymdastyrýǵa atsalyspaq.
Aǵymdaǵy jyl mereıtoılarǵa toly jyl, sondaı-aq, oblys ortalyǵynda 1,5 myńnan astam adamnyń qatysýymen Qazaqstan jáne Reseıdiń áriptestik jónindegi aımaqaralyq forýmy ótedi.
Azamattyq qorǵanystyń kópbeıindi joǵary kolledjiniń 4 kýrs stýdenti Valerııa Garbýz volonterlik qyzmeti týraly aıtty.
«Bári kolledjdiń volonter tobyna qosylýynan bastaldy. Aldymen biz qarııalarǵa kómektestik. Qar tazalap, úılerdiń aýlasyn jınadyq. Ótken jyly kolledjden qarajat jınap, jalǵyzbasty qarııalarǵa azyq-túlik satyp áperdik», - dedi volonter Valerııa Garbýz.
Qazirgi kezde, ol kórshi turatyn 93 jastaǵy qarııany óz qamqorlyǵyna alypty.