Kókshetaýda kitaphanashylar eńbegi elendi
KÓKShETAÝ. KAZINFORM – Kókshetaýdaǵy Maǵjan Jumabaev atyndaǵy Aqmola oblystyq ámbebap ǵylymı kitaphanasy bazasynda óńirdiń úzdik kitaphanashylaryn ulyqtaýǵa arnalǵan saltanatty jıyn ótti.
Rýhanı qundylyqtardy dáripteýdi maqsat etken is-sharaǵa sala mamandary, zııaly qaýym ókilderi men oqyrmandar jınaldy.
Jıynda Aqmola oblysy ákiminiń atynan quttyqtaý sóz sóılegen oblys ákiminiń orynbasary Dosulan Aıtbaev kitaphana isiniń qoǵamdaǵy mańyzyn erekshe atap ótti. Onyń aıtýynsha, kitaphana – tek aqparat kózi ǵana emes, ulttyń rýhanı damýyna yqpal etetin mańyzdy mádenı ortalyq. Sondaı-aq ol Ulttyq kitap kúnine arnalǵan onkúndik aıasynda atqarylǵan jumystarǵa joǵary baǵa berip, sala qyzmetkerlerine alǵys bildirdi.
Aıta keteıik, onkúndik barysynda oblystyń qala jáne aýdan ortalyqtarynda túrli mádenı is-sharalar uıymdastyryldy. Atap aıtqanda, kitap festıvalderi, oqý marafondary, jazýshylarmen kezdesýler men avtograf-sessııalar, jańa kitap klýbtarynyń ashylýy turǵyndardyń kitap oqýǵa degen qyzyǵýshylyǵyn arttyrýǵa baǵyttaldy.
Bıyl óńirde taǵy bir mańyzdy bastama júzege aspaq. Oblystyq ámbebap ǵylymı kitaphananyń 80 jyldyq mereıtoıy aıasynda Kókshetaýda alǵash ret respýblıkalyq deńgeıdegi kitaphanashylar forýmy ótedi. Atalǵan is-shara Qazaqstandyq kitaphanalyq odaq qoldaýymen uıymdastyrylmaq.
Forým kásibı tájirıbe almasýǵa, óńiraralyq yntymaqtastyqty nyǵaıtýǵa jáne kitaphana mamandarynyń biliktiligin arttyrýǵa baǵyttalady. Sonymen qatar, bul alań jańa ıdeıalar men ınnovatsııalyq tájirıbelerdi engizýge, qoǵamda kitap oqýdy keńinen nasıhattaýǵa múmkindik beredi dep kútilip otyr.
Uıymdastyrýshylardyń málimetinshe, aýqymdy jıynǵa elimizdiń barlyq óńirlerinen memlekettik organdardyń ókilderi, jetekshi kitaphanashylar, sondaı-aq mádenıet, bilim berý jáne tsıfrlyq tehnologııalar salasynyń sarapshylary qatysady.
Budan bólek, aldaǵy bir aı ishinde oblys boıynsha jappaı kitap klýbtaryn ashý josparlanyp otyr. Bul bastama aıasynda 200 myńnan astam oqyrmandy qamtý kózdelgen. Sarapshylar mundaı jobalar kitap oqý mádenıetin jańa deńgeıge kóterýge yqpal etedi dep esepteıdi.
