Kókshetaýda qar jaýdy
ASTANA. KAZINFORM – Sınoptıkterdiń málimetinshe, aldaǵy táýlikterde jańbyr men qar aralas jaýyn-shashyn bolady.
3 qarashaǵa qaraǵan túni Kókshetaýda alǵashqy qar jaýdy. Alaıda aýa temperatýrasynyń nólden joǵary bolýyna baılanysty qar birtindep erip jatyr.
2 qarasha kúni, 112 qyzmeti aqmolalyqtardy 3 qarashada óńirde boran bolatyny týraly eskertken bolatyn. Jel ońtústik-shyǵystan soltústikke aýysady, tańerteń jáne kúndiz ekpini 15–20 m/s-qa deıin jetedi, al 3–4 qarasha kúnderi qar jaýady dep boljanǵan.
«Qazgıdromet» RMK Aqmola oblysy fılıalynyń 1-sanatty ınjener-sınoptıgi Gúljan Baımuqanovanyń aıtýynsha, oblys aýmaǵynda turaqsyz sıpattaǵy tsıklon saqtalyp tur.
- Oblys boıynsha jańbyr men qar aralas jaýyn-shashyn bolyp jatyr, boran men kóktaıǵaq bolady dep boljanady. Batys pen soltústik-shyǵysta tuman. Aýa temperatýrasy túnde mınýs 3 pen plıýs 2 gradýs aralyǵynda, kúndiz de sol shamada. Shyǵysta plıýs 4 gradýs. Kókshetaý qalasy boıynsha kúndiz shamamen nól gradýs. Aldaǵy táýlikte jańbyr men qar boljanady. Sonymen qatar ylǵal, qar men temperatýranyń aýysýy saldarynan kóktaıǵaq, kúndiz boran bolady, - dedi Gúljan Baımuqanova.
Mamannyń aıtýynsha, 7 qarashaǵa deıin túnde oblys boıynsha qar jaýady, kúndiz qar soltústikte, shyǵysta jáne ońtústikte baıqalady, keıde qar qalyń túsýi múmkin. Jeldiń ekpini 15–20 m/s, túnde aýa temperatýrasy mınýs 5–10 gradýs, kúndiz mınýs 3–8 gradýs shamasynda bolady dep boljanyp otyr.
Aıta ketsek, Qazgıdromet RMK 3 qarashada elimizdiń basym bóliginde jaýyn-shashyn bolatynyn boljady.