Kókshetaý qalasy jylýmen tolyq qamtyldy

KÓKShETAÝ. QazAqparat – Kókshetaýda jylýmen qamtý jumystary turaqtandyryldy. Bul týraly Óńirlik kommýnıkatsııalar qyzmeti alańynda ótken brıfıngide qala ákiminiń orynbasary Baýyrjan Ernazarov málim etti, dep habarlaıdy QazAqparat tilshisi.

Aqmola oblystyq ishki saıasat basqarmasynyń aqparatyna sáıkes, b ıyl Kókshetaýda jylytý maýsymy qala turǵyndarynyń ótinishi eskerile otyryp, 22 qyrkúıekte bastaldy.

Qala ákimi orynbasarynyń aıtýynsha, sýyqqa daıyndyq jumystary ázirlengen is-sharalarǵa sáıkes júrgizildi.

«Qubyrdyń tyǵyzdyǵy men beriktigin anyqtaý úshin gıdravlıkalyq synaqtar júrgizildi, magıstraldyq jáne oramishilik jylý jelileri aýystyryldy, sorǵy stantsııalarynyń tehnologııalyq jáne elektr jabdyqtaryn tekserý jáne jóndeý, sondaı-aq 6698 birlik kóleminde bekitý armatýrasyn tekserý jáne jóndeý júrgizildi», - dedi Baýyrjan Ernazarov.

Ol atap ótkendeı, oblys ortalyǵyndaǵy keıbir shaǵynaýdandardaǵy úılerde jylýdyń turaqsyzdyǵy, qolaısyz temperatýra obektıvti sebeptermen týyndaǵan.

«Qala nysandaryn jylýmen jabdyqtaý júıesine qosý jumystary negizgi jylý magıstrali arqyly júzege asyrylady. Alaıda, tutynýshylar sanynyń ulǵaıýyna baılanysty keıbir turǵyn úılerge jylý qýaty jetkiliksiz boldy. Sondyqtan 4 qarashada qurylys-montajdaý jumystary aıaqtalǵan qosalqy jylý magıstraliniń qurylysy men qaıta jańartylýyn júzege asyrý týraly sheshim qabyldandy. Jumystyń ózi tamyz aıynda Reseıde arnaıy tapsyrys boıynsha eki aı daıyndalǵan dıametri 1000 qubyrdy kútýge baılanysty bastaldy.

Krasnoıar jáne Zastantsıonnyı kentindegi jergilikti qazandyqtarǵa keletin bolsaq, onda jumys shtattyq rejımde júrgizilýde. Jylý berý maýsymy bastalǵannan beri shaǵymdar bolǵan joq», - dep túsindirdi Baýyrjan Ernazarov.

Jergilikti bıliktiń aıtýynsha, jylýmen qamtamasyz etý jaǵdaıy baqylaýda. Búgingi tańda temperatýra rejımi bekitilgen jylý kestelerine sáıkes saqtalǵan.