Kókshetaý qalasynyń ardagerleri referendýmdy qoldaıdy
KÓKShETAÝ. KAZINFORM — Belsendi uzaq ómir ortalyǵynda ardagerlermen kezdesýde óńir basshysy Marat Ahmetjanov referendým ótkizýdiń tártibi týraly egjeı-tegjeıli aıtyp berdi. Oblys ákimi barlyq qyzyqtyrǵan suraqtarǵa jaýap berip, el bolashaǵyna áser etetin sheshimder qabyldaýda árbir azamattyń qatysýynyń mańyzdylyǵyn erekshe atap ótti.
— Konstıtýtsııa — bul tek Negizgi zań ǵana emes. Bul Táýelsizdigimizdiń irgetasy, árbir azamattyń quqyqtary men bostandyqtarynyń kepili. Bul — Qazaqstannyń bolashaǵy qandaı bolatynyn aıqyndaıtyn qujat. Ár adamnyń daýysy — bizdiń azamattyq ustanymymyz ben bolashaq urpaq aldyndaǵy jaýapkershiligimizdiń kórinisi. Biz tańdaǵan jolymyz arqyly memleketimizdiń qandaı bolatyny anyqtalady, balalarymyz ben nemerelerimizdiń qandaı elde ómir súretini soǵan baılanysty. Sondyqtan eshkim beıqam qalmaýy kerek, — dep atap kórsetti Marat Ahmetjanov.
Ardagerler pikir almasýǵa belsendi qatysty, óz kózqarastarymen bólisti jáne referendým ótkizýdi qoldady, óz oılaryn bildirýdiń qajettiligin atap ótti.
— Aqmolalyqtar árdaıym joǵary azamattyq jaýapkershiligimen jáne birliktigimen erekshelengen. Bizdiń óńir — turaqtylyqty, damýdy jáne qoǵamdyq kelisimdi baǵalaıtyn belsendi ómir ustanymy bar eńbek adamdary. Biz ómirimizdi, barlyq bilimimizdi qalalar men aýyldardyń damýyna arnadyq, sondyqtan elimizde osyndaı aýqymdy saıası oqıǵalar bolyp jatqanda beıqam qalý múmkin emes, — dedi Abaı Myrzahmetov atyndaǵy ýnıversıteti ardagerler keńesiniń tóraǵasy Esbolat Dúsenbaev.
Kezdesýdiń sońynda ákim ardagerlerge belsendi azamattyq ustanymdary úshin alǵys aıtyp, olardyń referendýmdaǵy qatysýy jastar men oblys ortalyǵy turǵyndary úshin úlgi bolatynyna senim bildirdi.