Qyzylordada kókjótel 34,8 ese azaıdy

QYZYLORDA. KAZINFORM — Ótken jyly Qyzylorda oblysynda kókjóteldiń 6 deregi zerthanalyq, klınıkalyq jáne epıdemıologııalyq jolmen naqtylandy. 

Oblystyq sanıtarııalyq -epıdemıologııalyq baqylaý basqarmasynan habarlaǵandaı, 2024 jylmen salystyrǵanda bul kórsetkish 34,8 ese tómen. Barlyq derek 14 jasqa deıingi balalar arasynan anyqtaldy. Dárigerler bul aýrýǵa negizinen eki jasqa tolmaǵan balalar shaldyǵatynyn aıtyp otyr. Balalardy kókjótelden qorǵaýdyń jalǵyz senimdi jáne tıimdi ádisi — vaktsınatsııa.

— Alǵashqy ekpe balanyń 2, 3, 4 jáne 18 aılyǵynda júrgiziledi. Ári qaraı 6, 16 jasta jáne ár 10 jylda eresekterde júrgiziledi. Bul rette dıfterııaǵa, kókjótelge jáne sirespege qarsy ımmýnıtetti damytýǵa múmkindik beretin aralas vaktsına qoldanylady, — delingen habarlamada.

Departament ókilderi kókjóteldi juqtyryp almas úshin ýaqytyly ekpe alýǵa keńes beredi. 

— Sonymen qatar sanıtarııalyq-gıgıenalyq talaptardy jaýapkershilikpen oryndaýdy suraımyz. Aýrýdyń belgileri baıqalǵan kezde jedel medıtsınalyq kómekke júginý kerek, — delingen departament habarlamasynda. 

Eske salaıyq, byltyr elimizde qyzylsha jáne kókjótelmen syrqattanýshylyq azaıdy.