Qyzylordada aıdyń sońynda kún sýı bastaıdy

QYZYLORDA. KAZINFORM — Sınoptıkter Qyzylordada kúz mezgiliniń qalaı ótetinin boljady. Boljamdy «Qazgıdromet» kásipornynyń oblystyq fılıaly jarııalady.

Mamandardyń aıtýynsha, ótken kúzge qaraǵanda bıyl kún raıy 1, 2 °S-ge tómen bolyp tur. 

— Qyrkúıek aıynda ortasha aýa temperatýrasy +18, +20°S, ıaǵnı jyldaǵy mólsher shamasynda. Jaýyn-shashynnyń aılyq mólsheri oblystyń basym bóliginde normadan az kútilip otyr. Al soltústik batys aýdandarda, ıaǵnı Aral men Qazalyda jaýyn kóbirek túsedi. Qyrkúıektiń ekinshi onkúndiginde aýa temperatýrasy túnde +7, +20°S, kúndiz +20, +25°S-qa tómendeıdi. Degenmen, úshinshi onkúndikte qaıtadan joǵarylaıdy. Kúndiz +25, +28°S, túnde +10, +15°S-qa kóteriledi. Aıdyń sońyna qaraı kún sýı bastaıdy. Topyraq betine úsik túsýi múmkin, — dedi «Qazgıdromet» fılıaly meteoboljaý bóliminiń bastyǵy Áıgerim Jókelova.

Qazan aıynda aýanyń ortasha temperatýrasy óńirdiń batys jartysynda qalypty, shyǵys bóliginde normadan 1° joǵary bolmaq. Jaýyn-shashyn da ádettegiden artyq-kem túspeıdi.

— Qarasha aıynda ortasha aýa temperatýrasy normadan 1° joǵary bolady. Jaýyn-shashyn mólsheri oblystyń basym bóliginde normadan az, al soltústik batysynda, ıaǵnı Aral aýdanynda qalypty mólsherdi kórsetip otyr. Qystyń alǵashqy aıy kún raıynyń da, jaýyn-shashyn mólsheriniń de jyldaǵydan aýytqymaıtynymen erekshelenedi, — dedi Áıgerim Jókelova.

Aıta keteıik, «Qazgıdromet» 10 qyrkúıekte aýa raıyna baılanysty elimizdiń birqatar óńirinde daýyldy eskertý jarııalady.