Qyzylorda oblysynda qansha soǵys ardageri bar?
QYZYLORDA. KAZINFORM — Qyzylorda oblysynda ekinshi dúnıejúzilik soǵysqa qatysqan 2 ardager bar.
Sonyń biri — jasy 103-ke taıaǵan ıAhııa Tasyrov. Ol búginde Syrdarııa aýdanynyń Tereńózek kentinde turyp jatyr. ıAhııa ata soǵys jyldarynda Stalıngrad, Kýrsk, Baranov jáne Polshany jaýdan azat etýge qatysqan. Dantsıg portynda aıaǵynan aýyr jaralanyp, soǵysty Germanııada aıaqtap, 1945 jyly qyrkúıek aıynda elge oralǵan.
— Meniń zamandastarym úshin sum soǵys úlken synaq boldy. Mundaı endi qaıtalanbasyn. Biz beıbit ómirdiń qadirin bilýimiz kerek. Óıtkeni bul qanshama adamnyń kóz jasymen, qanymen keldi, — dedi soǵys ardageri.
Al ekinshi qart maıdanger Tileýbergen Tobabergenulynyń jasy búginde 100-den asty. Qazaly aýdanynyń turǵyny. Soǵys jyldary atqyshtar polkiniń quramynda bolǵan. Belarýs, Polsha, Chehoslovakııa, Kenıgsberg, Kalınıngrad qalalaryn jaýdan azat etýge qatysty. Soǵys aıaqtalǵasyn tutqynǵa alynǵan nemis-fashıst basqynshylarynyń jaýyngerlerin kúzetýge qaldyrylǵan. Týǵan jerge 1947 jyly ǵana qaıtqan.
Bıyl Jeńistiń 80 jyldyǵy elimizde keń kólemde atalyp ótedi. Aımaǵymyzda da merekelik is-sharalar jospary bekitildi.
— Soǵysqa qatysýshylarǵa, olarǵa teńestirilgen ardagerler men soǵys jyldary keminde jarty jyl eńbek etken tyl ardagerlerine tólenetin áleýmettik kómek mólsheri jyl saıyn artyp keledi. Úkimet basshysynyń tapsyrmasyna sáıkes bıyl barlyq óńirde kómek kólemi 5 mıllıon teńgege artyp, ol 9 mamyr — Jeńis kúni qarsańynda beriledi, — dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Smat Seıdahmetov.
Soǵys ýaqytynda tylda keminde 6 aı jumys istegen 1700-ge jýyq ardagerge, UOS ardagerine teńestirilgen jáne ártúrli áskerı is-qımyl saldarynan múgedek bolǵan 1481 adamǵa taǵaıyndalǵan áleýmettik tólem mólsheri bıyl 40 AEK-ten 50 AEK-ke kóbeıdi. Alaıda, soǵys ardagerleriniń qatary jyldan-jylǵa sırep barady. 2023 jyly 6 ardagerdiń árqaısysyna 1,5 mln teńgeden, al byltyr 4 adamǵa 2,5 mıllıon teńgeden berilgen bolatyn.
Jaqynda biz Almatyda 23 soǵys ardageri turyp jatqanyn jazǵanbyz.