Qyzylorda oblysynda eki aýdanda ákim saılaýy ótip jatyr

Qyzylorda oblysynda Syrdarııa jáne Shıeli aýdandarynyń turǵyndary búgin ákim saılaýyna qatysady, dep habarlaıdy Kazinform.

Eki aýdanda 70 myńnan astam adam tańdaý jasaı alady. Bul maqsatta Syrdarııada – 18, Shıelide 40 ýchaskelik komıssııanyń 388 múshesi jumys atqarady.

«Bul aýdandarda 70 myńnan astam saılaýshy tirkelgen. Alǵash ret daýys beretin azamattarǵa arnaıy syılyqtar uıymdastyrylady. Saılaý komıssııalarynyń málimeti boıynsha 2 aýdanda 1011 azamat alǵash ret daýys berýge qatysady. Onyń 694-y Shıeli, 317-i Syrdarııa aýdanynda turady. Sondaı-aq pılottyq saılaý ótetin aýdandarda 5 qarasha kúni 18 jasqa tolatyn 5 azamat bar. Olar da óz konstıtýtsııalyq quqyǵyn paıdalana otyryp daýys bere alady», - dep málim etti oblystyq saılaý komıssııasynan.

Aıta ketsek, eki aýdanǵa kandıdat retinde 6 azamat tirkelgen. Olardyń barlyǵy da joǵary bilimdi, memlekettik qyzmettiń túrli satysynan ótken.