Qytaıdyń ózara tarıfterdi tómendetý sheshimi 14 mamyrda kúshine enedi

ASTANA. KAZINFORM – Qytaı bıligi 14 mamyr kúni saǵat 12:01-den bastap AQSh-ta óndirilgen ımporttyq taýarlarǵa salynatyn qosymsha baj salyǵyn 10%-ǵa deıin tómendetetinin jarııalady.

Qytaı Qarjy mınıstrliginiń Salyq komıteti 13 mamyrda jarııalaǵan habarlamaǵa sáıkes, Qytaı-AQSh saýda kelissózderinde qol jetken mańyzdy ýaǵdalastyqty iske asyrý maqsatynda, Qytaı Memlekettik keńesiniń maquldaýymen, qosymsha baj salyǵynyń mólsheri 34%-dan 10%-ǵa deıin azaıtylady jáne 90 kún ishinde 24 paıyzdyq tarıftiń qoldanylýy ýaqytsha toqtatylady.

Sondaı-aq, 14 mamyr saǵat 12:01–den bastap Salyq komıtetiniń 2025 jylǵy № 5 jáne № 6 habarlamalarynda qarastyrylǵan AQSh-qa qarsy qosymsha tarıftik sharalardyń qoldanylýy toqtatylady.

Donald Tramp Aq úıge oralǵannan keıin, fentanıl kontrabandasyna qarsy kúres jáne «ózara tarıfter» saıasaty aıasynda Qytaı taýarlaryna salynatyn baj salyǵyn 145%-ǵa deıin kótergen bolatyn. Buǵan jaýap retinde resmı Beıjiń AQSh taýarlaryna 125% qarymta tarıf engizgen.

Qytaı men AQSh arasyndaǵy tarıftik teketiresti báseńdetý maqsatynda Shveıtsarııanyń Jeneva qalasynda ótken alǵashqy kelissózdiń nátıjesinde qos tarap ózara engizilgen joǵary tarıfterdi 90 kúnge deıin tómendete turýǵa ýaǵdalasty. Eki el 12 mamyr kúni birlesken málimdeme jarııalap, aldaǵy ýaqytta saýda-ekonomıkalyq yntymaqtastyq boıynsha kelissózdi jalǵastyra túsýge nıetti ekenin rastady.

AQSh pen Qytaı ózara tarıfterdi 90 kúnge tómendetýge keliskennen keıin aktsııa baǵalarynyń kúrt óskenin jazǵan edik.