AQSh Germanııadaǵy shamamen 5 myń áskerin bir jyldyń ishinde shyǵarady
ASTANA. KAZINFORM — AQSh Qorǵanys mınıstrligi (Pentagon) Germanııada ornalasqan áskerı kontıngentti qysqartý josparyn rastady. Josparǵa sáıkes, aldaǵy 6–12 aı ishinde shamamen 5 myń amerıkandyq áskerı qyzmetker elden shyǵarylmaq. Bul týraly Anadoly agenttigi jazdy.
Pentagon ókili Shon Parnelldiń aıtýynsha, bul sheshim jergilikti jaǵdaıdy jan-jaqty taldaý nátıjesinde qabyldanǵan.
Ol buǵan deıin AQSh prezıdenti Donald Tramp Germanııadaǵy amerıkalyq ásker sanyn qysqartý múmkindigin qarastyrǵanyn, sodan keıin naqty sheshim jarııalanǵanyn atap ótti.
Qazirgi tańda Germanııa aýmaǵynda 36,4 myńnan astam AQSh áskeri ornalasqan. Osylaısha, Germanııa AQSh-tyń sheteldegi eń iri áskerı bazalarynyń biri bolyp, Japonııadan keıin ekinshi orynda tur.
Mertstiń málimdemesi jáne Tramptyń jaýaby
Germanııa kantsleri Frıdrıh Merts AQSh-tyń Iranmen qaqtyǵysyn tez aıaqtaý múmkin emes ekenin aıtyp, Iran tarapy kútkennen de kúshtirek ekenin jáne Vashıngtonnyń kelissóz strategııasy álsiz ekenin málimdegen.
Mertstiń pikirinshe, AQSh qaqtyǵysqa naqty josparsyz aralasqan, bul ony sheshýdi qıyndatady. Sondaı-aq ol «búkil bir halyq Iran bıliginiń qysymyna ushyrap otyr» degen pikir bildirdi.
Bul málimdemelerge Donald Tramp áleýmettik jelide jaýap berip, Merts «jaǵdaıdy durys túsinbeı otyr» dep synǵa aldy jáne onyń Irannyń ıadrolyq baǵdarlamasyna qatysty baǵasyn qate dep atady.
Sonymen qatar Tramp Germanııadaǵy AQSh áskerı kúshterin qysqartý máselesi qarastyrylyp jatqanyn rastady.
Aıta keteıik, AQSh-tyń teńiz blokadasy Irandy $4,8 mlrd shyǵynǵa ushyratty.
