Qytaıdaǵy túngi bazarda atys bolyp, eki adam qaza tapty

ASTANA. KAZINFORM — Qytaıdyń Hýbeı provıntsııasy, Ýhan qalasyndaǵy túngi bazarda 18 mamyr, jeksenbi kúni atys bolyp, kem degende eki adam jaraqat aldy, eki adam kóz jumǵan.

Sıngapýrdyń «Lianhe Zaobao» basylymynyń habarlaýynsha, 18 mamyr kúni keshke áleýmettik jelilerde Ýhan qalasynyń Tsıaokoý aýdany, Chýnjen kóshesindegi túngi bazarda jergilikti ýaqytpen saǵat 22:00 shamasynda káýap satatyn túngi bazarda atys bolǵany týraly birneshe beınejazba tarady. Kýágerlerdiń aıtýynsha, qarýly adam kem degende tórt ret oq atqan, saldarynan eki adam qaza taýyp, qylmysker oqıǵa ornynan qashyp ketken.

Jelide taraǵan beınejazbada atystan keıin oqıǵa ornynda qan izderi men shashylǵan zattar kórinedi. Bir er adam oryndyqta otyryp, basy artqa qaraı shalqaıǵan kúıde es-tússiz jatyr. Kýágerlerdiń aıtýynsha, oryndyqtaǵy er adamnyń basyna oq tıip, sol jerde qaza tapqan. Taǵy bir jaralanǵan er adam jerde jatqan, ol da aýyr jaraqattan kóz jumǵan.

Jelidegi aqparatqa sáıkes, oryndyqta otyrǵan er adam kásipker bolǵan, al jerde jatqan ekinshi jaralanǵan adam onyń kólik júrgizýshisi eken.

Sıngapýrdyń Lianhe Zaobao basylymynyń habarlaýynsha, Ýhan qalasynyń polıtsııasy qylmyskerdiń ustalǵanyn habarlady, biraq basqa málimetterdi ashpady.