Qytaıda Aýǵanstan men Pákistan arasynda kelissózder ótti

ASTANA. KAZINFORM — 1–7 sáýir aralyǵynda Qytaıdyń Shyńjań-Uıǵyr avtonomııalyq aýdanyndaǵy Úrimji qalasynda Qytaı, Aýǵanstan jáne Pákistan ókilderiniń beıresmı kezdesýi ótti, dep habarlaıdy Kazinform-nyń Beıjińdegi menshikti tilshisi.

QHR Syrtqy ister mınıstrliginiń resmı ókili Mao Nınniń málimetinshe, úsh el delegatsııalarynyń quramyna syrtqy ister, qorǵanys jáne qaýipsizdik salalarynyń ókilderi kirgen.

Onyń aıtýynsha, taraptar qolaıly jaǵdaıda ashyq ári pragmatıkalyq pikir almasyp, naqty nátıjege baǵyttalǵan kelissózder júrgizgen.

Úsh el qazirgi kúrdeli halyqaralyq jáne óńirlik ahýalda Aýǵanstan men Pákistan arasyndaǵy tatý kórshilik qarym-qatynasty saqtaý olardyń halyqtarynyń ál-aýqaty, sondaı-aq Ońtústik Azııadaǵy beıbitshilik pen turaqtylyq úshin asa mańyzdy ekenin atap ótti.

Sondaı-aq taraptar dıalog pen keńesýler halyqaralyq daýlardy, onyń ishinde Aýǵanstan men Pákistan arasyndaǵy kelispeýshilikterdi sheshýdiń tıimdi joly ekenin jetkizdi.

Taraptar aýǵan-pákistan qatynastaryndaǵy máselelerdi sheshý úshin negizgi jáne basym baǵyttardy aıqyndaı otyryp, keshendi sheshimderdi qarastyrýǵa kelisti.

Mao Nın terrorızmniń aýǵan-pákistan qatynastaryna áser etetin negizgi faktor ekenin atap ótti.

— Úsh tarap «Úrimji protsesiniń» mańyzdy ekenin moıyndap, osy másele boıynsha baılanys pen dıalogty jalǵastyrýǵa kelisti, — dep qosty ol.

Aıta keteıik, 2025 jyldyń sońynan beri Pákistan men Aýǵanstan qarym-qatynasy shıelenisken kúıde qalyp otyr. Olardyń arasyndaǵy dál qazirgideı qarýly qaqtyǵys buryn-sońdy bolmaǵan. Kazinform tilshisi Orta Azııa elderi úshin munyń qandaı saldary bolýy múmkin ekeni jóninde tájikstandyq saıasattanýshy Sheralı Rızoenniń pikirin bilgen edi.