Qytaı qaıtadan álemdegi mıllıarderler sany boıynsha kóshbasshy atandy

ASTANA. KAZINFORM — Hurun Global Rich List-tiń sońǵy nusqasy boıynsha Qytaı mıllıarderler eli ataǵyn qaıtaryp aldy. Onda baılardyń sany rekordtyq kórsetkishke (1110) jetti, dep habarlaıdy SCMP.

Aqparatta «mıllıarderlerdiń kóbeıýi qor naryǵynyń ósýimen jáne jasandy ıntellektiniń damýymen baılanysty» delingen.

Hurun Group uıymynyń 5 naýryzda jarııalanǵan jyldyq esebine qaraǵanda, álemdegi 4020 mıllıarderdiń 1110-y Qytaıdan ekeni anyqtaldy. Olardyń qatary bir jylda 287 adammen tolyqqan. Bul eldiń sońǵy úsh jyldaǵy shyǵynyn ótep, 1000 mıllıarderi bar AQSh pen 308 baı adam mekendeıtin Úndistannan asyp túsýge múmkindik berdi.

Tehnologııanyń, ásirese jasandy ıntellektiniń damýy baılyqtyń kózine aınaldy. Qytaıdyń jańa mıllıarderleri qatarynda 3,6 mıllıard dollarlyq taza baılyǵymen MiniMax kompanııasynan ıAn Tszıýntsze jáne 1,2 mıllıard dollary bar Knowledge Atlas Technology AQ-dan (Zhipu) Lıý Debın bar. Búkil álem boıynsha JI-men baılanysty kompanııalarda barlyǵy 114 mıllıarder jumys isteıdi, olardyń 46-sy baılardyń tizimine alǵash ret kirdi.

Hurun tizimindegi álemdegi eń baı adamdardyń úshtigine Ilon Mask (792 mıllıard dollar), Djeff Bezos (300 mıllıard dollar) jáne Larrı Peıdj (281 mıllıard dollar) kirdi. Ilon Mask baılyǵy 700 mıllıard dollardan asatyn alǵashqy adam boldy.

Qalalar arasynda 146 mıllıarderi bar Nıý-Iork álemdik kóshbasshy bolyp qala beredi. Odan keıin kezekti Shenchjen (132), Shanhaı, Beıjiń jáne London jalǵastyrady. Álemdegi mıllıarderlerdiń ortasha jasy — 65.

Aıta keteıik, Qazaqstan álemdik ekonomıkada úzdik 50 eldiń qataryna endi.

Forbes 2025 jylǵy álemniń eń baı adamdar tizimine 7 qazaqstandyq kásipkerdi engizdi.